കാസറഗോഡ്: കാസറഗോഡ് പെരിയയിലെ സഫാരി ഫൂവൽസ് എന്ന ഭാരത് പെട്രോളിയത്തിന്റെ പെട്രോൾ പമ്പിൽ ഇന്ന് രാവിലെ ഉണ്ടായ അക്രമത്തിൽ പ്രതിഷേധിച്ച് ജില്ലയിലെ മുഴുവൻ പെട്രോൾ പമ്പുകളും മാർച്ച് 12ന് രാവിലെ 6 മുതൽ 10 മണി വരെയുള്ള നാല് മണിക്കൂർ അടച്ചിടും എന്ന് AKFPT ജില്ലാ സെക്രട്ടറി രാധാകൃഷ്ണൻ അറിയിച്ചു.
ചില്ലറയില്ലാത്തതുമായി ബന്ധപ്പെട്ട വാക്ക് തർക്കത്തെ തുടുർന്ന് പമ്പ് ജീവനക്കാരനെ അക്രമിക്കുന്നത് തടയാൻ വന്ന യാത്രക്കാരനാണ് കുത്തേറ്റത്. സാരമായി പരിക്കേറ്റ ഇയാളെ മംഗലാപുരത്തെ സ്വകാര്യ ആശുപത്രിയിലും ക്രൂരമായി മർദ്ദനമേറ്റ പമ്പ് ജീവനക്കാരനെ കാഞ്ഞങ്ങാട് ആശുപത്രിയിലും പ്രവേശിപ്പിച്ചു.
പമ്പ് ജീവനക്കാരനായ അമ്പലത്തറ സ്വദേശി അനൂപിനെ മർദിക്കുന്നത്‌ തടയാൻ ചെന്നപ്പോഴാണ് ലോഡിങ് തൊഴിലാളിയും സിഐടിയു മെമ്പറും ആയ കാഞ്ഞങ്ങാട് ചെമ്മട്ടം വയലിലെ ഷിജുവിന് കുത്തേറ്റത്.
അക്രമവിവരം അറിഞ്ഞ ഉടനെ ബേക്കൽ പോലീസ് സംഭവസ്ഥലത്ത് എത്തി അന്വേഷണം നടത്തി പ്രതിയെ അറസ്റ്റു ചെയ്തു. കുണിയ സ്വദേശിയായ സാബിറിനെയാണ് അറസ്റ്റ് ചെയ്തത്.