തിരുവനന്തപുരം:കോവിഡ് നിയന്ത്രണങ്ങളുടെ ഭാഗമായി സ്വകാര്യ ബസുകളിൽ ഏർപ്പെടുത്തിയിരുന്ന ഒറ്റ-ഇരട്ട നമ്പർ ക്രമീകരണം ഒഴിവാക്കി.ഇന്നലെ മുതല്‍ എല്ലാ ബസുകള്‍ക്കും സര്‍വീസ് നടത്താമെന്നാണ് ഉത്തരവ്. ജില്ലാ ദുരന്ത നിവാരണ അതോറിറ്റി യോഗത്തിലാണ് ഇത് സംബന്ധിച്ച തീരുമാനം എടുത്തത്.നമ്പർ ക്രമീകരണം അശാസ്ത്രീയമാണെന്ന് തുടക്കം മുതല്‍തന്നെ വിമര്‍ശനം ഉയര്‍ന്നിരുന്നു. ഗ്രാമീണ സര്‍വീസുകളെയും സാധാരണക്കാരെയും ഈ ക്രമീകരണം സാരമായി ബാധിച്ചു. വിവിധ ബസുടമസ്ഥ സംഘടനകള്‍ തീരുമാനത്തിനെതിരേ രംഗത്ത് വരികയും ചെയ്തു.ജില്ലാ ദുരന്ത നിവാരണ അതോറിറ്റി യോഗ തീരുമാനപ്രകാരം വിവിധ ജില്ലകളിലെ പെര്‍മിറ്റുള്ള സ്റ്റേജ് കാര്യേജുകള്‍ക്ക് എല്ലാ ദിവസവും സര്‍വീസ് നടത്താം. സീറ്റിന്റെ എണ്ണത്തില്‍ കൂടുതല്‍ യാത്രക്കാരെ കയറ്റി സര്‍വീസ് നടത്താന്‍ പാടില്ല. നിന്നുള്ള യാത്രയും അനുവദിക്കില്ല. ഇക്കാര്യം കണ്ടക്ടര്‍മാര്‍ ഉറപ്പുവരുത്തണം. നിര്‍ദേശങ്ങള്‍ ലംഘിക്കുന്നവര്‍ക്കെതിരേ കര്‍ശന നടപടികള്‍ സ്വീകരിക്കുമെന്നും ആര്‍.ടി.ഒ അറിയിച്ചു.