തിരുവനന്തപുരം: സംസ്ഥാനത്ത് നിയന്ത്രണങ്ങളോടെ ആരാധനാലയങ്ങൾ തുറക്കാൻ അനുമതി.ടെസ്റ്റ് പോസിറ്റിവിറ്റി റേറ്റ് കുറവുള്ള പ്രദേശങ്ങളിലെ ആരാധനാലയങ്ങൾക്കാണ് അനുമതി നൽകിയിരിക്കുന്നത്. ഒരേ സമയം 15 പേർക്ക് ആരാധനാലയങ്ങളിൽ പ്രവേശിക്കാം. കോവിഡ് മാനദണ്ഡങ്ങൾ കൃത്യമായി പാലിച്ചായിരിക്കും ആരാധനാലയങ്ങൾ പ്രവർത്തിക്കുകയെന്നും മുഖ്യമന്ത്രി അറിയിച്ചു.ടെസ്റ്റ് പോസിറ്റിവിറ്റി നിരക്ക് 16 ൽ താഴെയുള്ള തദ്ദേശസ്ഥാപന പരിധികളിലെ ആരാധനാലയങ്ങൾക്ക് തുറന്നു പ്രവർത്തിക്കാം. സംസ്ഥാനത്ത് ടെലിവിഷൻ പരമ്പര ചിത്രീകരണം ഇൻഡോറായി അനുവദിക്കും. കോവിഡ് മാനദണ്ഡങ്ങൾ പാലിച്ച് പ്രധാന ടൂറിസം കേന്ദ്രങ്ങൾ തുറക്കാൻ അനുവദിക്കുന്നത് പരിഗണനയിലാണ്.എന്നാൽ രണ്ട് ഡോസ് വാക്‌സിൻ എടുത്തവർക്ക് മാത്രമേ സന്ദർശിക്കാൻ അനുമതിയുള്ളു. ശനിയാഴ്ചയും ഞായറാഴ്ചയും ട്രിപ്പിൾ ലോക്ഡൗണിന് സമാനമായ നിയന്ത്രണങ്ങൾ തുടരുമെന്നും മുഖ്യമന്ത്രി അറിയിച്ചു.