തിരുവനന്തപുരം:മുഖ്യമന്ത്രി പിണറായി വിജയനും കെപിസിസി പ്രസിഡന്റ് സുധാകരനും തമ്മിലുള്ള വാക് പോര് കൂടുതൽ രാഷ്ട്രീയ ചർച്ചകളിലേക്ക് നീങ്ങുന്നു.തന്റെ മക്കളെ തട്ടിക്കൊണ്ട് പോകാൻ കെ സുധാകരൻ ശ്രമിച്ചുവെന്നായിരുന്നു മുഖ്യമന്ത്രിയുടെ പ്രസ്ഥാവന. വിഷയത്തിൽ കെപിസിസി അദ്ധ്യക്ഷൻ ഇന്ന് പ്രതികരിച്ചേക്കും.ഇന്നലെ നടന്ന പതിവ് വാർത്താ സമ്മേളനത്തിലാണ് മുഖ്യമന്ത്രി പിണറായി വിജയൻ കെപിസിസി അദ്ധ്യക്ഷൻ കെ സുധാകരനെതിരെ ആരോപണവുമായി രംഗത്തെത്തിയത്. തന്റെ മക്കളെ തട്ടിക്കൊണ്ട് പോകാൻ സുധാകരൻ പദ്ധതിയിട്ടു. സുധാകരന്റെ വിശ്വസ്തൻ തന്നെയാണ് ഇക്കാര്യം പറഞ്ഞതെന്നും മുഖ്യമന്ത്രി വ്യക്തമാക്കി. കൂടാതെ സുധാകരനെതിരേ ഗുരുതര ആരോപണങ്ങളും മുഖ്യമന്ത്രി ഉന്നയിച്ചിരുന്നു.ബ്രണ്ണൻ കോളേജിൽ പരീക്ഷയെഴുതാനെത്തിയപ്പോൾ താൻ പിണറായി വിജയനെ ചവിട്ടി വീഴ്ത്തിയെന്ന കെ.സുധാകരന്റെ വെളിപ്പെടുത്തലിനെ തുടർന്നായിരുന്നു മുഖ്യമന്ത്രിയുടെ പ്രതികരണം. മുഖ്യമന്ത്രി നടത്തിയ ആരോപണത്തോട് കെ സുധാകരൻ ഇന്ന് പ്രതികരിച്ചേക്കും. ഈ പ്രതികരണം കൂടുതൽ രാഷ്ട്രീയ ചർച്ചക്ക് വഴിവെക്കുമെന്നതിൽ സംശയമില്ല. ഇന്ന് രാവിലെയോടെയാണ് പതിനൊന്ന് മണിയ്‌ക്ക് വാര്‍ത്താസമ്മേളനം നടത്തുമെന്ന് സുധാകരന്‍ അറിയിച്ചിരിക്കുന്നത്. എറണാകുളം ഡി സി സി ഓഫീസില്‍ വച്ചാണ് വാര്‍ത്താസമ്മേളനം.ബ്രണ്ണൻ കോളേജ് കാലത്തെ രാഷ്ട്രീയ വിഷയങ്ങളുടെ പേരിൽ മുഖ്യമന്ത്രിയും കെപിസിസി അദ്ധ്യക്ഷനും വാക്പോരിലേക്ക് നീങ്ങുമ്പോൾ കണ്ണൂർ രാഷ്ട്രീയം സംസ്ഥാനത്ത് വീണ്ടും ചർച്ചയാകുകയാണ്.