കൊച്ചി: കൊച്ചി പനമ്പളളി നഗർ ബ്യൂട്ടി പാർലർ വെടിവെയ്പ് കേസിലെ പ്രതിയായ അധോലോക കുറ്റവാളി രവി പൂജാരിയെ കൊച്ചിയിലെത്തിച്ചു. ബംഗലൂരു പരപ്പന ജയിലിൽ നിന്നാണ് ഇന്നലെ രാത്രി ഒൻപത് മണിയോടെ രവി പൂജാരിയെ നെടുമ്പാശേരിയിൽ എത്തിച്ചത്. ഇയാളെ നെടുമ്പാശേരി പോലീസ് സ്‌റ്റേഷനിലേക്ക് മാറ്റി. ഇന്ന് ഓൺലൈൻ വഴി കോടതിയിൽ ഹാജരാക്കും.രവി പൂജാരിയെ എത്തിക്കുന്നതുമായി ബന്ധപ്പെട്ട് നെടുമ്പാശേരി വിമാനത്താവളത്തിൽ കേരള പോലീസിലെ കമാൻഡോകളെ വിന്യസിച്ചിരുന്നു. കേസിൽ ചോദ്യം ചെയ്യാനായി ഈ മാസം 8 വരെയാണ് രവി പൂജാരിയെ ക്രൈംബ്രാഞ്ചിന്റെ കസ്റ്റഡിയിൽ വിട്ടുനൽകിയിട്ടുളളത്. 2018 ഡിസംബർ 15 നായിരുന്നു പനമ്പളളി നഗറിലെ ബ്യൂട്ടി പാർലറിൽ അക്രമി സംഘം വെടിയുതിർത്തത്.കേസുമായി ബന്ധപ്പെട്ട് പരാതിക്കാരിയായ ലീന മരിയ പോളിനെ വിളിച്ചത് ഉൾപ്പെടെയുളള കാര്യങ്ങൾ നേരിട്ടറിയാനാകും അന്വേഷണ ഉദ്യോഗസ്ഥർ ശ്രമിക്കുക. ഇതിനായി ഇയാളുടെ ശബ്ദസാമ്പിളുകളും ശേഖരിക്കും.ഓൺലൈനായി എറണാകുളം അഡീഷണൽ സിജെഎം കോടതിയിൽ ഹാജരാക്കിയാണ് രവി പൂജാരിയെ കസ്റ്റഡിയിൽ വാങ്ങിയത്. കൊറോണ പരിശോധനയും നടത്തിയിരുന്നു.