കണ്ണൂർ: ഇരിട്ടി ഹയർ സെക്കൻഡറി സ്‌കൂളിൽ കവർച്ച.കമ്പ്യൂട്ടർ ലാബിൽ സൂക്ഷിച്ചിരുന്ന 29 ലാപ്‌ടോപ്പുകൾ മോഷണം പോയി.ഐടി പരീക്ഷ നത്തുന്നതിനായാണ് ഇത്രയും ലാപ്‌ടോപ്പുകൾ റൂമിൽ സജ്ജീകരിച്ചത്.ലാബിലുണ്ടായിരുന്ന മുഴുവൻ ലാപ്‌ടോപ്പുകളും മോഷ്ടാക്കൾ കവർന്നു. സ്‌കൂളിന്റെ പിറക് വശത്തുള്ള ഗ്രിൽസ് തകർത്ത് സ്‌കൂളിനുള്ളിൽ പ്രവേശിച്ച മോഷ്ടാക്കൾ തൊട്ടടുത്ത കംപ്യൂട്ടർ ലാബിന്റെ മുറിയുടെ ഗ്രില്ലിന്റേയും വാതിലിന്റേയും പൂട്ട് തകർത്താണ് ഉള്ളിൽ കയറിയത്. വാക്‌സിനേഷൻ സെന്ററായി നഗരസഭ സ്‌കൂൾ ഏറ്റെടുത്തിരുന്നു. ഇതേ തുടർന്ന് ഓഫീസ് പ്രവർത്തനം അനിശ്ചിത കാലത്തേയ്ക്ക് നിർത്തി വെച്ചിരിക്കുകയായിരുന്നു. ഇന്നലെ സ്‌കൂൾ ജീവനക്കാർ സ്‌കൂളിലെ പ്രധാന മുറികൾ പരിശോധിക്കവെയാണ് ലാപ്‌ടോപ്പുകൾ നഷ്ടമായത് തിരിച്ചറിഞ്ഞത്. പൊതുവിദ്യാഭ്യാസ വകുപ്പ് പല ഘട്ടങ്ങളായി നൽകിയ 25000 രൂപ മുതൽ 28000 രൂപ വരെ വിലമതിയ്ക്കുന്ന ലാപ്‌ടോപ്പുകളാണ് മോഷണം പോയത്. ഇതെല്ലാം കൂടി എട്ട് ലക്ഷത്തോളം രൂപ വിലവരും. കണ്ണൂരിൽ നിന്ന് ഡോഗ് സ്‌ക്വാഡും ഫൊറെൻസിക് വിദഗ്ധരും സ്‌കൂളിലെത്തി പരിശോധന നടത്തും. കഴിഞ്ഞ ലോക്ഡൗൺ സമയത്തും സ്‌കൂളിൽ മോഷണം നടന്നിരുന്നു. അന്ന് രണ്ട് കംപ്യൂട്ടറും രണ്ട് ലാപ്‌ടോപ്പും യുപിഎസുമാണ് മോഷണം പോയത്.