ദില്ലി: ഓക്സിജൻ പ്രതിസന്ധിയെത്തുടർന്ന് ദില്ലി ഗംഗാറാം ആശുപത്രിയിൽ 24 മണിക്കൂറിനിടെ 25 കൊവിഡ് രോഗികൾ മരിച്ചതായി ആശുപത്രി അധികൃതർ.60 പേരുടെ നില ഗുരുതരമാണ്. 2 മണിക്കൂർ കൂടി നൽകാനുള്ള ഓക്സിജനേ ആശുപത്രിയിൽ ഉള്ളൂ. എത്രയും വേഗം ഓക്സിജൻ എത്തിക്കണമെന്നും മെഡിക്കൽ ഡയറക്ടർ ആവശ്യപ്പെട്ടു. തലസ്ഥാനത്തെ ഏറ്റവും വലിയ സ്വകാര്യ ആശുപത്രികളില്‍ ഒന്നാണ് സര്‍ ഗംഗാറാം ആശുപത്രി.മരിച്ച രോഗികളുടെയെല്ലാം അവസ്ഥ ഗുരുതരമായിരുന്നെന്നും എല്ലാവരും കൂടുതല്‍ ഓക്സിജന്‍ വേണ്ട നിലയിലായിരുന്നെന്നും ആശുപത്രി അധികൃതര്‍ വ്യക്തമാക്കി.ബുധനാഴ്ച രാത്രി ആശുപത്രിക്ക് ഓക്സിജന്‍ ലഭ്യമാക്കിയിരുന്നു. എന്നാല്‍ മണിക്കൂറുകള്‍ മാത്രമേ ഇത് നീണ്ടു നില്‍ക്കുകയുള്ളൂവെന്ന് അധികൃതര്‍ അപ്പോള്‍ തന്നെ അറിയിച്ചിരുന്നു.”ഐനോക്സില്‍ നിന്നുള്ള ട്രക്കുകള്‍ ആശുപത്രിയിലേക്ക് വന്നുകൊണ്ടിരിക്കുകയാണ്. അവര്‍ എത്തുന്നതുവരെ ഞങ്ങള്‍ കാത്തിരിക്കുകയാണ്. തടസ്സമില്ലാത്തതും സമയബന്ധിതമായി ഓക്സിജന്‍ വിതരണം ചെയ്യാനാകുന്ന അവസ്ഥയാണ് ഞങ്ങള്‍ക്ക് ആവശ്യം,” ആശുപത്രി ചെയര്‍മാന്‍ അറിയിച്ചു.