കണ്ണൂര്‍: കണ്ണൂര്‍ നഗരത്തിനടുത്തെ താഴെചൊവ്വയില്‍ ഉഗ്രസ്‌ഫോടക ശക്തിയുള്ള സ്ഫോടകവസ്തുക്കൾ പിടികൂടി. രഹസ്യവിവരം ലഭിച്ചതനുസരിച്ച്‌ കണ്ണൂര്‍ ടൗണ്‍ പൊലീസ് സബ്ബ് ഇന്‍സ്‌പെക്ടര്‍ സി.ജി ഷൈജുവിന്റെ നേതൃത്വത്തിലുള്ള പോലീസ് സംഘമാണ് റെയ്ഡ് നടത്തിയത്. താഴെചൊവ്വ സ്വദേശി സാന്ത്വനംവീട്ടില്‍ ബിജു (45) വിന്റെ വീടിനു സമീപത്തുനിന്നാണ് ഉല്‍സവങ്ങള്‍ക്കും മറ്റും വെടിക്കെട്ടുകള്‍ക്ക് ഉപയോഗിക്കുന്ന ഉഗ്ര സ്‌ഫോടകശേഷിയുള്ള 20 ഗുണ്ടു പടക്കങ്ങൾ പിടികൂടിയത്.പ്രതി സ്‌ഫോടക വസ്തുക്കള്‍ അനധികൃത വില്‍പ്പനക്കായി കൊണ്ടു വച്ചതാണെന്ന് പൊലീസ് പറഞ്ഞു. റെയ്ഡിനെത്തിയ പൊലീസിനെ കണ്ട പ്രതി സംഭവ സ്ഥലത്തുനിന്നും ഓടി രക്ഷപ്പെട്ടു. എസ് ഐ സീതാറാം, എ എസ് ഐ റഷീദ്, ബാബു, എസ് സി പി ഓ ബിനീഷ്, സി പി ഓ സജീഷ്, ഗഫൂര്‍, തുടങ്ങിയവരും റെയിഡില്‍ പങ്കെടുത്തു. കണ്ണൂര്‍ ടൗണ്‍ പൊലീസ് സ്റ്റേഷനില്‍ സ്‌ഫോടകവസ്തു നിരോധന പ്രകാരം കേസ് രജിസ്റ്റര്‍ ചെയ്തിട്ടുണ്ട്. പ്രതിക്കായുള്ള അന്വേഷണം ഊര്‍ജിതമാക്കിയിട്ടുണ്ടെന്ന് പൊലിസ് അറിയിച്ചു.