പാലക്കാട് : നഗരത്തിലുണ്ടായ വന്‍ തീപിടുത്തത്തില്‍ സ്റ്റേഡിയം ബസ് സ്റ്റാന്‍ഡ് റോഡിലെ ഹോട്ടല്‍ പൂര്‍ണ്ണമായും കത്തിനശിച്ചു. പാലക്കാട് സ്റ്റേഡിയം ബൈപ്പാസിനടുത്തുള്ള നൂര്‍ജഹാന്‍ ഓപ്പണ്‍ ഹില്ലിലാണ് തീപിടിത്തം. റസ്റ്ററന്റ് പൂര്‍ണമായി കത്തി നശിച്ചു. ഷോര്‍ട്ട് സര്‍ക്യൂട്ടാണ് തീപിടുത്തതിന് കാരണമെന്നാണ് പ്രാഥമിക നിഗമനം. ചെറിയ രീതിയില്‍ തീ പടര്‍ന്നപ്പോള്‍ തന്നെ ആളുകള്‍ പുറത്തിറഞ്ഞിയത് വലിയ ഒരു അപകടമാണ് ഒഴിവായത്.ഹോട്ടലില്‍നിന്ന് എല്ലാവരെയും രക്ഷപെടുത്തിയതായി ജില്ലാ ഫയര്‍ ഓഫിസര്‍ പറഞ്ഞു. രണ്ടു യൂണിറ്റ് ഫയര്ഫോഴ്സ് എത്തി തീയണയ്ക്കാനുള്ള ശ്രമം തുടരുകയാണ്.മൂന്ന് നിലകളിലായി വാടക കെട്ടിടത്തില്‍ പ്രവര്‍ത്തിക്കുന്ന ഹോട്ടല്‍ ഉച്ചക്ക്‌ ശേഷമാണ് തുറന്ന് പ്രവര്‍ത്തിക്കുകയെന്നതിനാല്‍ ജീവനക്കാര്‍ മാത്രമേ അപകടസമയത്തുണ്ടായിരുള്ളു. തീപ്പിടുത്തത്തിന്റെ ശബ്ദം കേട്ട് എല്ലാവരും പുറത്തിറങ്ങി ഓടി രക്ഷപ്പെടുകയായിരുന്നു.മൂന്ന് നില കെട്ടിടങ്ങളിലായി ഓരോന്ന് വീതം അടുക്കളയുമുണ്ടെന്നാണ് ജീവനക്കാര്‍ പറയുന്നത്. തീപ്പിടുത്തത്തില്‍ ഹോട്ടലിലുണ്ടായിരുന്ന ഫര്‍ണീച്ചറുകളും അടുക്കള സാമഗ്രികളും അടക്കം പൂര്‍ണമായി കത്തിനശിച്ചിട്ടുണ്ട്.സമീപമുള്ള അറേബ്യന്‍ ഗ്രില്‍ ഹോട്ടലിലെ ജീവനക്കാരും നൂര്‍ജഹാന്‍ ഹോട്ടലില്‍ തീപിടിക്കുന്നത് കണ്ട് പുറത്ത് ഓടി രക്ഷപ്പെടുകയായിരുന്നു. ഈ ഹോട്ടലിലെ തീ ഫയര്‍ ഫോഴസ് ഉടനെ തീ അണച്ചതിനാല്‍ ഭാഗികമായാണ് കത്തി നശിച്ചത്. ജില്ലാ ഫയര്ഫോഴ്സ് ഓഫീസര്‍ അരുണ്‍ ഭാസ്‌കറിന്റെ നേതൃത്വത്തിലുള്ള സംഘം രണ്ട് മണിയോടെയാണ് ഹോട്ടലുകളിലെ തീ പൂര്‍ണ്ണമായും അണച്ചത്. തീപ്പിടത്തത്തെ തുടര്‍ന്ന് ഈ വഴിയുള്ള ഗതാഗതവും മണിക്കൂറോളം സ്തംഭിച്ചു.