തിരുവനന്തപുരം:സംസ്ഥാനസർക്കാരിന്റെ ബജറ്റ് അവതരണം പുരോഗമിക്കുന്നു. സംസ്ഥാനത്തെ വിവിധ ക്ഷേമപെന്‍ഷനുകള്‍ പ്രതിമാസം 1600 രൂപയായി ഉയര്‍ത്താന്‍ തീരുമാനിച്ചു. ഈ ഏപ്രില്‍ മാസം മുതല്‍ തന്നെ വര്‍ധന പ്രാബല്യത്തില്‍ വരും. നിലവില്‍ 1500 രൂപയാണ് പ്രതിമാസ പെന്‍ഷന്‍.പുതുവര്‍ഷ സമ്മാനമെന്ന നിലയില്‍ സാമൂഹിക സുരക്ഷാ പെന്‍ഷനും ക്ഷേമ പെന്‍ഷനും 2021 ജനുവരി മാസം മുതല്‍ 100 രൂപ വര്‍ധിപ്പിച്ചിരുന്നു. 1,400 രൂപയില്‍ നിന്നാണ് 1500 രൂപയാക്കിയത്. അതാണിപ്പോള്‍ 1600 രൂപയാക്കിയത്.സംസ്ഥാനത്ത് സാമൂഹിക സുരക്ഷാ പെന്‍ഷന്‍ വാങ്ങുന്ന 49.44 ലക്ഷം പേരും ക്ഷേമപെന്‍ഷന്‍ വാങ്ങുന്ന 10.88 ലക്ഷം പേരുമുണ്ട്. കോവിഡിനെതുടര്‍ന്നുള്ള സാമ്പത്തിക പ്രതിസന്ധി രൂക്ഷമായ സമയത്താണ് ബജറ്റ് എന്നതാണ് ഇത്തവണത്തെ ബജറ്റിന്റെ സവിശേഷത. തിരഞ്ഞെടുപ്പിന് രണ്ടുമാസംമാത്രം അവശേഷിക്കേയാണ് ധനമന്ത്രി ബജറ്റ് അവതരിപ്പിക്കുന്നത് എന്നതും ശ്രദ്ധേയമാണ്.കര്‍ഷക നിയമങ്ങളേയും ബജറ്റില്‍ വിമര്‍ശിച്ചു. തറവില സമ്പ്രദായം തകര്‍ക്കുന്നത് കുത്തകള്‍ക്ക് വേണ്ടിയാണെന്നും ധനമന്ത്രി പറഞ്ഞു. കേരളം ഒറ്റക്കെട്ടായി ഇതിനെ നേരിടുമെന്നും തോമസ് ഐസക് പറഞ്ഞു. റബ്ബറിന്റെ തറവില 170 രൂപ. നെല്ലിന്റെ സംഭരണ വില 28, തേങ്ങയുടേത് 32ഉം ആയി ഉയര്‍ത്തി