ന്യൂഡൽഹി:കേന്ദ്ര ഭക്ഷ്യ, പൊതുവിതരണമന്ത്രിയും ലോക്‌ജൻശക്തി പാർടി(എൽജെപി) സ്ഥാപകനേതാവുമായ രാം വിലാസ് പാസ്വാൻ(74 ) അന്തരിച്ചു. വ്യാഴാഴ്ച രാത്രി എട്ടരയോടെയാണ്‌ അന്ത്യം.ഹൃദ്രോഗത്തെത്തുടർന്ന് കഴിഞ്ഞയാഴ്ച ഡൽഹിയിലെ എയിംസിൽ പ്രവേശിപ്പിച്ചിരുന്ന പാസ്വാന്റെ ആരോഗ്യനില വ്യാഴാഴ്ച വൈകീട്ടോടെ വഷളാവുകയായിരുന്നു. മകനും പാർട്ടി അധ്യക്ഷനുമായ ചിരാഗ് പാസ്വാൻ എം.പി.യാണ് മരണവിവരം ട്വിറ്ററിലൂടെ അറിയിച്ചത്. ഒരാഴ്‌ചയ്‌ക്കിടെ രണ്ട്‌ ഹൃദയശസ്‌ത്രക്രിയക്ക്‌ വിധേയനായിരുന്നു. നരേന്ദ്ര മോദി സര്‍ക്കാരില്‍ കേന്ദ്ര ഭക്ഷ്യ വിതരണ മന്ത്രിയായിരിക്കെയാണ് രാം വിലാസ് പാസ്വാന്റെ അന്ത്യം. 2014 മുതല്‍ പാസ്വാന്‍ മോദി സര്‍ക്കാരില്‍ അംഗമാണ്. എന്‍ഡിഎയില്‍ എത്തുന്ന ആദ്യത്തെ ദളിത് നേതാവ് കൂടിയാണ് രാം വിലാസ് പാസ്വാന്‍. എന്‍ഡിഎയുടെ ദളിത് മുഖമായാണ് പസ്വാന്‍ അറിയപ്പെട്ടത്. 1969ല്‍ സംയുക്ത സോഷ്യലിസ്റ്റ് പാര്‍ട്ടിയിലെ അംഗമായിട്ടാണ് പാസ്വാന്റെ രാഷ്ട്രീയ പ്രവേശനം. 2019ല്‍ അദ്ദേഹം രാഷ്ട്രീയ ജീവിതത്തില്‍ 50 വര്‍ഷം പൂര്‍ത്തിയാക്കി. 5 മുന്‍ പ്രധാനമന്ത്രിമാരുടെ സര്‍ക്കാരില്‍ രാംവിലാസ് പാസ്വാന്‍ മന്ത്രിയായിരുന്നിട്ടുണ്ട്.സംയുക്ത സോഷ്യലിസ്റ്റ് പാര്‍ട്ടിയിലൂടെയാണ് അദ്ദേഹം രാഷ്ട്രീയ പ്രവര്‍ത്തനം തുടങ്ങിയത്. ലോക്ജനശക്തി പാര്‍ട്ടിയുടെ സ്ഥാപക നേതാവ് കൂടിയാണ് പാസ്വാന്‍. ബീഹാറില്‍ നിര്‍ണായകമായ നിയമസഭാ തിരഞ്ഞെടുപ്പിന് കളമൊരുങ്ങുമ്പോളാണ് പസ്വാന്റെ വിയോഗം.