ലെബനൻ:ബെയ്റൂട്ട്: ലബനീസ് തലസ്ഥാന നഗരമായ ബെയ്റൂട്ടിൽ ഉണ്ടായ ഉഗ്രസ്ഫോടനത്തില്‍ മരിച്ചവരുടെ എണ്ണം 135 ആയി. സ്ഫോടനത്തില്‍ 4000നു മുകളില്‍ പേര്‍ക്കു പരിക്കേറ്റു. കാണാതായ നൂറിലധികം പേര്‍ക്കായുള്ള തെരച്ചില്‍ പുരോഗമിക്കുകയാണ്.ചൊവ്വാഴ്ച വൈകുന്നേരം ആറിന് ബെയ്റൂട്ടിലെ തുറമുഖ മേഖലയില്‍ തീപിടിച്ചതിനു പിന്നാലെയാണു സ്ഫോടനം ഉണ്ടായത്. ഒരു ഗോഡൗണില്‍ മുന്‍കരുതലില്ലാതെ സൂക്ഷിച്ചിരുന്ന 2,750 ടണ്‍ അമോണിയം നൈട്രേറ്റ് പൊട്ടിത്തെറിച്ചതാണു ദുരന്തത്തിനു കാരണമെന്നു ലബനീസ് പ്രസിഡന്‍റ് മിഷേല്‍ ഔണ്‍ അറിയിച്ചു. റിക്ടര്‍ സ്കെയിലില്‍ 3.5 തീവ്രത രേഖപ്പെടുത്തിയ സ്ഫോടനമാണ് നടന്നത്.240 കിലോമീറ്റര്‍ അകലത്തുള്ള സൈപ്രസില്‍വരെ ശബ്ദം കേട്ടു. സ്ഫോടനമേഖലയിലെ കെട്ടിടങ്ങളെല്ലാം നിലംപരിശായി. കിലോമീറ്ററുകള്‍ അകലെയുള്ള കെട്ടിടങ്ങള്‍ കുലുങ്ങി, ജനല്‍ച്ചില്ലുകള്‍ തകര്‍ന്നു.റോഡുകള്‍ ജനല്‍ച്ചില്ലും മറ്റ് അവശിഷ്ടങ്ങളുംകൊണ്ടു നിറഞ്ഞത് രക്ഷാപ്രവര്‍ത്തനം വൈകിച്ചു. അവശിഷ്ടങ്ങള്‍ക്കിടെ കുടുങ്ങിക്കിടക്കുന്നവരുടെ ദൃശ്യങ്ങള്‍ ലബനീസ് മാധ്യമങ്ങള്‍ പുറത്തുവിട്ടിരുന്നു.