മലപ്പുറം: കരിപ്പൂര്‍ വിമാനത്താവളത്തില്‍ വീണ്ടും സ്വര്‍ണവേട്ട. രാവിലെ ഗള്‍ഫില്‍ നിന്ന് വന്ന ചാര്‍ട്ടേര്‍ഡ് വിമാനത്തില്‍ എത്തിയ കണ്ണൂര്‍ സ്വദേശി ജിതിന്‍ എന്ന യാത്രക്കാരനില്‍ നിന്നാണ് 736 ഗ്രാം മിശ്രിത സ്വര്‍ണം പിടികൂടിയത്. അടിവസ്ത്രത്തില്‍ ഒളിപ്പിച്ച നിലയിലായിരുന്നു സ്വര്‍ണം. മാര്‍ക്കറ്റില്‍ 36 ലക്ഷത്തോളം രൂപ വിലമതിക്കും.ഇന്നലെയും ചാര്‍ട്ടേര്‍ഡ് വിമാനങ്ങളില്‍ എത്തിയ രണ്ട് യാത്രക്കാരനില്‍ നിന്ന് രണ്ടര കിലോ സ്വര്‍ണം പിടികൂടിയിരുന്നൂ. ഇവരെല്ലാം ഒരു സംഘമാണോ എന്ന് അന്വേഷണം നടക്കുന്നുണ്ട്. കോവിഡ് കാലത്തെ പ്രത്യേക വിമാനങ്ങളില്‍ പോലും സ്വര്‍ണക്കടത്ത് കണ്ടെത്തിയതോടെ പരിശോധന കര്‍ശനമാക്കാന്‍ കസ്റ്റംസ് തീരുമാനിച്ചു.കൊവിഡ് ലോക്ഡൗണിനെ തുടര്‍ന്ന് പതിവ് വിമാന സര്‍വീസുകള്‍ റദ്ദാക്കിയതോടെയാണ് ഗള്‍ഫ് രാജ്യങ്ങളില്‍ കുടുങ്ങിക്കിടക്കുന്നവര്‍ക്കായി വിവിധ സംഘടനകളുടെ നേതൃത്വത്തില്‍ ചാര്‍ട്ടേര്‍ഡ് വിമാനങ്ങള്‍ ഏര്‍പ്പെടുത്തിയത്.