കണ്ണൂർ:കണ്ണൂർ-കാസർകോഡ് ജില്ലാ അതിർത്തികളിലെ റോഡുകൾ പൂർണ്ണമായും അടച്ചിട്ട് പോലീസ് നടപടി ശക്തമാക്കി.ചികിത്സാ ആവശ്യത്തിന് പോകുന്നവർക്ക് മാത്രമാണ് ഇനി അതിർത്തി തുറന്നു കൊടുക്കുക.അതിർത്തിയിലെ 11 റോഡുകളാണ് അടച്ചത്. ദേശീയപാതയിലൂടെ കാലിക്കടവ് വഴിയും മലയോര ഹൈവേയിലെ ചെറുപുഴ പാലം വഴിയും കടുത്ത നിയന്ത്രണങ്ങൾക്ക് വിധേയമായി മാത്രമേ ഇനി യാത്ര ചെയ്യാവൂ.ഇടറോഡുകളിലെല്ലാം നേരത്തെ നിയന്ത്രണങ്ങളുണ്ടായിരുന്നെങ്കിലും കർശനമാക്കിയിരുന്നില്ല.കഴിഞ്ഞ ദിവസം കണ്ണൂർ ജില്ലാ പോലീസ് മേധാവി അതിർത്തിയിലെ റോഡുകളിൽ സന്ദർശനം നടത്തിയിരുന്നു. തുടർന്നാണ് നിയന്ത്രണം കർശനമാക്കാൻ തീരുമാനിച്ചത്.കാൽനടയാത്രക്കാർക്കും നിയന്ത്രണം ബാധകമാണ്.അതിർത്തിയിലെത്തിയ വാഹനങ്ങൾ തിരിച്ചയച്ചു.മൽസ്യവില്പനക്കാരോട് അതാത് ജില്ലകൾ കേന്ദ്രീകരിച്ച് വിൽപ്പന നടത്താൻ ആവശ്യപ്പെട്ടു.അത്യാവശ്യമുള്ളവരെ മാത്രമേ ചെറുപുഴ പുതിയപാലം വഴി കടത്തിവിടുന്നുള്ളൂ.