തിരുവനന്തപുരം: സംസ്ഥാനത്ത് മദ്യാസക്തിയുള്ളവര്‍ക്ക് ഡോക്ടറുടെ കുറിപ്പടി പ്രകാരം മദ്യം ഉടന്‍ വീട്ടിലെത്തില്ല. ബിവറേജസിന്‍റെ ഈ തീരുമാനം പിന്‍വലിച്ചു.ഇന്ന് രാവിലെ ബിവറേജസ് എംഡി ഇതുസംബന്ധിച്ച നിര്‍ദേശം ബിവറേജസ് മാനേജര്‍മാര്‍ക്ക് കൈമാറി.സംസ്ഥാനത്ത് ഡോക്ടറുടെ കുറിപ്പടി പ്രകാരം അപേക്ഷ സമര്‍പ്പിച്ച അഞ്ച് പേര്‍ക്കാണ് ഇന്ന് മദ്യം നല്‍കാന്‍ ബെവ്കോ തീരുമാനിച്ചത്.എന്നാല്‍ മദ്യം വീട്ടിലെത്തിക്കുന്നത് അബ്കാരി ചട്ടത്തിനും ലോക്ക്ഡൗണ്‍ നിര്‍ദേശങ്ങള്‍ക്കും എതിരാണെന്ന് ബിവ്റേജസ് എംഡിക്ക് നിയമോപദേശം ലഭിച്ചിരുന്നു.ഇതേതുടര്‍ന്നാണ് നടപടിയെന്നാണ് വിവരം.എക്സൈസ് മന്ത്രി മുഖ്യമന്ത്രിയുമായി ആലോചിച്ചതിനു ശേഷമായിരിക്കും ഇക്കാര്യത്തില്‍ തുടര്‍ നടപടികള്‍ സ്വീകരിക്കുക. നേരത്തെ ഇന്നു മുതല്‍ മദ്യം നൂറു രൂപ സര്‍വീസ് ചാര്‍ജ് ഈടാക്കി വീട്ടിലെത്തിക്കുന്ന നടപടികള്‍ ആരംഭിക്കാനായിരുന്നു തീരുമാനം.കേന്ദ്രസർക്കാരും ഈ നടപടിക്കെതിരെ രംഗത്തെത്തിയിരുന്നു.ദേശീയ ദുരന്തനിവാരണ നിയമത്തിന്റെ ലംഘനമാണെന്ന് വ്യക്തമാക്കി ആഭ്യന്തര സെക്രെട്ടറി സംസ്ഥാന ചീഫ് സെക്രെട്ടറിക്ക് കത്ത് നൽകിയിരുന്നു.