കണ്ണൂര്‍: പയ്യന്നൂരില്‍ ഷോപ്പിംഗ് മാളിന് തീപിടിച്ചു.പുതിയ ബസ് സ്റ്റാന്‍ഡ്‌ കെട്ടിടത്തിന്റെ സമീപത്തുള്ള ഷോപ്രിക്‌സ് എന്ന ഷോപ്പിംഗ് മാളിലാണ് വന്‍ തീപിടുത്തമുണ്ടായത്. സംഭവസ്ഥലത്ത് പത്ത് അഗ്‌നിശമനസേനാ യൂണിറ്റുകളെത്തിയിട്ടുണ്ട്. ഇവര്‍ തീയണയ്ക്കാനുള്ള ശ്രമം തുടരുകയാണ്.ഷോര്‍ട് സര്‍ക്യൂട്ടാണ് അഗ്നിബാധയ്ക്ക് കാരണമെന്നാണ് പ്രാഥമിക വിലയിരുത്തല്‍.തീ പടര്‍ന്നതും മാളില്‍ നിന്ന് മുഴുവന്‍ ആളുകളെയും പൊലീസ് ഒഴിപ്പിച്ചു. മാളിന്റെ മുകള്‍ഭാഗത്തേക്ക് തീ പടരുകയാണുണ്ടായത് എന്നാണ് ദൃക്‌സാക്ഷികള്‍ നല്‍കുന്ന വിവരം. മാളിന്റെ തൊട്ടടുത്തുള്ള കെട്ടിടത്തിലേക്കും തീ പടരുന്നുണ്ട്. മൂന്ന് നില കെട്ടിടത്തിന്റെ ടെറസ് ഷീറ്റ് ഉപയോഗിച്ച്‌ മറച്ച്‌ പാചകശാലയാക്കിയിരുന്നു. കെട്ടുകണക്കിന് വിറകാണ് ഇവിടെ സൂക്ഷിച്ചിരുന്നത്. ഒരു സിലിണ്ടറും ഇവിടെ പൊട്ടിത്തെറിച്ചതായി സൂചനയുണ്ട്. ഗുരുതര സുരക്ഷാവീഴ്ചയാണ് ഉണ്ടായതെന്ന് റീജിയണല്‍ ഫയര്‍ ഓഫീസര്‍ പറഞ്ഞു.