കോട്ടയം:കൊറോണ രോഗികളെ ശുശ്രൂഷിച്ച നഴ്സുമാരെ വാടകവീട്ടില്‍നിന്ന് പുറത്താക്കിയതായി പരാതി.വ്യാഴാഴ്ച രാത്രിയില്‍ കോട്ടയം മെഡിക്കല്‍ കോളജിനു സമീപമുള്ള കസ്തൂര്‍ബ ജംഗ്ഷനിലുള്ള വാടകവീട്ടില്‍ നിന്നുമാണ് നഴ്സുമാരെ ഇറക്കിവിട്ടത്. മൂന്ന് പുരുഷ നഴ്സുമാര്‍ ഒരുമിച്ചായിരുന്നു ഇവിടെ താമസം.രോഗം പടരാൻ സാധ്യതയുണ്ടെന്ന് വീട്ടുടമസ്ഥൻ പറഞ്ഞതായി നഴ്സുമാര്‍ ആരോപിക്കുന്നു. സംഭവത്തെ തുടര്‍ന്നു കോട്ടയം മെഡിക്കല്‍ കോളജ് ആശുപത്രി അധികൃതര്‍ നഴ്സുമാര്‍ക്ക് പേ വാര്‍ഡിനു മുകളിലത്തെ നില താമസ സൗകര്യത്തിനായി ഒരുക്കി നല്കിയിട്ടുണ്ട്. വാടക വീട്ടില്‍ നിന്നും നഴ്സുമാരെ ഇറക്കിവിട്ട സംഭവം സര്‍ക്കാരിനെ അറിയിക്കുമെന്ന് ആശുപത്രി അധികൃതര്‍ അറിയിച്ചു.