കണ്ണൂർ:നഗരമധ്യത്തിൽ വ്യാപാരിയെ അക്രമിക്കാന്‍ എത്തിയ ക്വട്ടേഷന്‍ സംഘത്തെ ടൗണ്‍പോലീസ് അറസ്റ്റ് ചെയ്തു.ഷമീം എന്ന ചാണ്ടി ഷമീം (34), അരിന്പ്ര സ്വദേശി നൗഫല്‍ (32), അത്താഴക്കുന്നിലെ വിഷ്ണു (22), എടക്കാട് സ്വദേശി അഷ്ഹാദ് (30) എന്നിവരെയാണ് പോലീസ് അറസ്റ്റ് ചെയ്തത്.ഇവരുടെ കൂടെയുണ്ടായിരുന്ന മുംബൈ സ്വദേശിനിയും തെക്കീബസാറില്‍ താമസിക്കുന്നതുമായ സംഘത്തിലെ യുവതിയെ പോലീസിന് അറസ്റ്റ് ചെയ്യാന്‍ സാധിച്ചില്ല.ക്വട്ടേഷന്‍ സംഘത്തെ പോലീസ് പിടികൂടുന്നതിനിടയില്‍ യുവതി ഓടി രക്ഷപ്പെടുകയായിരുന്നു.യുവതിക്കായി പോലീസ് അന്വേഷണം ഊര്‍ജിതമാക്കി.വ്യാപാരിയെ ആക്രമിക്കാനായി കാറില്‍ യുവതിയടങ്ങുന്ന നാലംഗ ക്വട്ടേഷന്‍ സംഘം എത്തി.എന്നാല്‍ വ്യാപാരിയെ ആക്രമിക്കുന്നത് സമീപത്തുണ്ടായിരുന്ന ആളുകള്‍ തടയുകയും തുടര്‍ന്ന് പോലീസില്‍ വിവരം അറിയിക്കുകയുമായിരുന്നു. തുടര്‍ന്ന് കണ്ണൂര്‍ ടൗണ്‍ പോലീസ് സ്ഥലത്ത് എത്തി.ഇതിനിടയില്‍ ക്വട്ടേഷന്‍സംഘം പോലീസിനെയും ആക്രമിക്കാന്‍ ശ്രമിച്ചു.10 മിനിറ്റ് നീണ്ടു നിന്ന മല്‍പിടുത്തത്തിന് ശേഷമാണ് പ്രതികളെ പോലീസ് കീഴടക്കിയത്.ഇതിനിടയില്‍ യുവതി ഓടിരക്ഷപ്പെടുകയും ചെയ്തു. പ്രതികളെ പോലീസ് പിടികൂടുന്നതിനിടയില്‍ പ്രതികളില്‍ ഒരാള്‍ ‘ബോലോ തക്ബീര്‍’ മുദ്രാവാക്യം വിളിക്കുകയും ചെയ്തു. പ്രതി മുദ്രാവാക്യം വിളിച്ചതോടെ കൂടുതല്‍ ആളുകള്‍ പോലീസിനെ വളഞ്ഞ് പ്രതികളെ രക്ഷപ്പെടുത്താന്‍ ശ്രമിച്ചു.ഇരയെ കയ്യില്‍ കിട്ടി കഴിഞ്ഞാല്‍ ഷോക്ക് അടിപ്പിച്ചു കാര്യം നേടലാണ് ഇവരുടെ രീതി.ക്വട്ടേഷന്‍ സംഘത്തില്‍നിന്ന് ഷോക്ക് അടിപ്പിക്കുന്ന ഇലക്‌ട്രോണിക് ഉപകരണം ഉള്‍പ്പെടെയുള്ള ആയുധങ്ങള്‍ പോലീസ് കണ്ടെടുത്തു. പിടിയിലായ പ്രതികളുടെ പേരില്‍ നിരവധി കേസുകള്‍ നിലവിലുണ്ടെന്ന് പോലീസ് അറിയിച്ചു.