ഉത്തർപ്രദേശ്:ഉത്തര്‍പ്രദേശിലെ ലക്നോ കോടതിയുടെ പരിസരത്തുണ്ടായ സ്ഫോടനത്തില്‍ രണ്ടു അഭിഭാഷകര്‍ക്ക് പരിക്ക്. ക്രൂഡ് ബോംബാണ് പൊട്ടിത്തെറിച്ചതെന്നാണ് പ്രാഥമിക നിഗമനം. ഇതേത്തുടര്‍ന്ന് പ്രദേശത്ത് പൊലീസും ബോംബ് സ്ക്വാഡും നടത്തിയ പരിശോധനയില്‍ മൂന്നു ബോംബുകള്‍ കൂടി കണ്ടെത്തി.സഞ്ജീവ് ലോധി എന്ന അഭിഭാഷകന്റെ ചേംബറിന് നേരെയാണ് ബോംബേറുണ്ടായത്. സംഭവത്തില്‍ ലോധി പരിക്കേല്‍ക്കാതെ രക്ഷപെട്ടു. ഇദ്ദേഹത്തിന് നേരെ രണ്ടു ബോംബുകളാണ് അജ്ഞാതരായ അക്രമികള്‍ എറിഞ്ഞത്. ഇതിലൊന്നാണ് പൊട്ടിത്തെറിച്ചത്. മറ്റൊരു അഭിഭാഷകനായ ജിതു യാദവാണ് ആക്രമണത്തിന് പിന്നിലെന്ന് ലോധി ആരോപിച്ചു.സംഭവത്തിന്റെ പശ്ചാത്തലത്തില്‍ വന്‍ പൊലീസ് സംഘം സ്ഥലത്തെത്തിയിട്ടുണ്ട്. കോടതിയിലും പരിസരത്തും അഭിഭാഷകര്‍ക്ക് സംരക്ഷണം ഏര്‍പ്പെടുത്തണമെന്ന് ആവശ്യപ്പെട്ട് ഒരു സംഘം അഭിഭാഷകര്‍ പ്രതിഷേധം ആരംഭിച്ചിട്ടുണ്ട്.