ന്യൂഡൽഹി:ഡല്ഹി മുഖ്യമന്ത്രിയായി ആം ആദ്മി പാർട്ടി നേതാവ് അരവിന്ദ് കെജരിവാള് ഞായറാഴ്ച്ച സത്യപ്രതിജ്ഞ ചെയ്യും.രാംലീല മൈതാനിയിലാണ് സത്യപ്രതിജ്ഞ ചടങ്ങുകള് നടക്കുക. ഇന്ന് ചേരുന്ന നിയമസഭാ കക്ഷി യോഗം അരവിന്ദ് കെജരിവാളിനെ നേതാവായി തെരഞ്ഞെടുക്കും.ഇത് മൂന്നാം തവണയാണ് കെജ്രിവാള് മുഖ്യമന്ത്രി സ്ഥാനത്ത് എത്തുന്നത്. ആകെയുള്ള എഴുപതില് 62 സീറ്റും നേടിയാണ് കെജരിവാള് ഭരണം നിലനിര്ത്തിയത്. അതേസമയം ഡല്ഹിയില് സര്ക്കാര് രൂപീകരണ ചര്ച്ചകള് പുരോഗമിക്കുകയാണ്. ആരൊക്കെയായിരിക്കും മന്ത്രിമാര് എന്നതില് കൂടിയാലോചന തുടരുകയാണ്.ഇത്തവണ കൂടുതല് പുതുമുഖങ്ങള്ക്ക് മന്ത്രിസഭയില് ഇടം ലഭിക്കുമെന്നാണ് റിപ്പോര്ട്ടുകള്. ഷഹീന് ബാഗ് ഉള്പ്പെടുന്ന ഓഖ്ല മണ്ഡലത്തില്നിന്നു തിളങ്ങുന്ന ജയം നേടിയ അമാനത്തുല്ല ഖാന്, കല്ക്കാജിയില്നിന്നു ജയിച്ച അതിഷി, രാജേന്ദ്ര നഗറില്നിന്നു സഭയില് എത്തിയ രാഘവ് ഛദ്ദ തുടങ്ങിയവര് മന്ത്രിമാരായേക്കുമെന്നാണ് സൂചന. മനീഷ് സിസോദിയ തന്നെയായിരിക്കും സര്ക്കാരില് രണ്ടാമന്. എന്നാല് സിസോദിയയുടെ വകുപ്പു മാറാന് ഇടയുണ്ട്.