ന്യൂ ഡല്‍ഹി:കഴിഞ്ഞ ദിവസം നടന്ന നിയമസഭാ തെരഞ്ഞെടുപ്പിന്റെ പോളിങ് ശതമാനം പുറത്തുവിട്ട് തെരഞ്ഞെടുപ്പ് കമ്മീഷന്‍. 62.59 ശതമാനം പോളിങ് രേഖപ്പെടുത്തി. ഒന്നിലധികം തവണ ബാലറ്റുകളുടെ സൂക്ഷ്മ പരിശോധന നടത്തിയത് കൊണ്ടാണ് പോളിങ് ശതമാനം പുറത്തുവിടാന്‍ കാലതാമസം വന്നതെന്നും ഡല്‍ഹി തെരഞ്ഞെടുപ്പ് കമ്മീഷന്‍ അറിയിച്ചു.അന്തിമ പോളിങ് ശതമാനം പുറത്തിടാന്‍ വൈകുന്നതില്‍ മുഖ്യമന്ത്രി അരവിന്ദ് കെജ്‌രിവാള്‍ രൂക്ഷ വിമര്‍ശനം ഉന്നയിച്ചിരുന്നു. വോട്ടിങ് യന്ത്രത്തില്‍ ക്രമക്കേട് നടന്നു എന്ന ആരോപണവും ഇതിനൊപ്പം ഉയര്‍ന്നു. ഇതെല്ലാം നിഷേധിച്ചാണ് കമ്മിഷന്‍ അന്തിമ കണക്ക് പുറത്തുവിട്ടത്.ശനിയാഴ്ച രാത്രി പോളിങ് ശതമാനം 57 എന്നായിരുന്നു അറിയിച്ചിരുന്നത്. 24 മണിക്കൂര്‍ പിന്നിട്ടപ്പോള്‍ അന്തിമ ശതമാനം 62.5 ആണെന്ന് കമ്മീഷന്‍ ഔദ്യോഗികമായി പ്രഖ്യാപിച്ചു. കണക്കെടുപ്പ് പൂര്‍ത്തിയാകാത്തതു കൊണ്ടാണ് വൈകിയത് എന്നായിരുന്നു കമ്മീഷന്റെ വാദം.അന്തിമ കണക്ക് തയ്യാറായ ഉടനെ പുറത്തുവിടുകയാണെന്നും മുഖ്യ തിരഞ്ഞെടുപ്പ് ഓഫീസര്‍ രണ്‍ബീര്‍ സിങ് അറിയിച്ചു. രാത്രിമഴുവന്‍ ഡാറ്റകള്‍ ശേഖരിക്കുകയായിരുന്നുവെന്നും റിട്ടേണിങ് ഓഫീസര്‍മാര്‍ തിരക്കായതിനലാണ് കണക്ക് വരാന്‍ വൈകിയതെന്നുമാണ് കമ്മിഷന്റെ വിശദീകരണം. ഒന്നിലധികം തവണ കണക്കുകള്‍ ഒത്തുനോക്കിയെന്നും കമ്മിഷന്‍ അവകാശപ്പെട്ടു.