കണ്ണൂർ:ഷെയര്‍ചാറ്റ് വഴി പരിചയപ്പെട്ട ഒന്‍പതാം ക്ലാസുകാരിയായ പെണ്‍കുട്ടിയെ തട്ടിക്കൊണ്ടുപോയി പീഡിപ്പിച്ച യുവാവ് തളിപ്പറമ്പിൽ അറസ്റ്റിൽ.കൊയ്യം പെരുന്തിലേരി ബോട്ട്കടവിലെ എ.വി.വാഹിദിനെയാണ്(22) തളിപ്പറമ്പ് സി ഐ എന്‍.കെ.സത്യനാഥന്റെ നേതൃത്വത്തില്‍ സാഹസികമായി പിടികൂടിയത്. പോക്സോ നിയമപ്രകാരമാണ് യുവാവിനെ അറസ്റ്റ് ചെയ്തത്.ഇക്കഴിഞ്ഞ ഇരുപതാം തീയതിയാണ് ഷെയര്‍ചാറ്റ് വഴി പത്ത് ദിവസം മുൻപ് പരിചയപ്പെട്ട ഒന്‍പതാംക്ലാസ് വിദ്യാര്‍ത്ഥിനിയെ സ്‌കൂളില്‍ പോകാന്‍ ബസ് കാത്തുനില്‍ക്കവെ സ്‌കൂളില്‍ ഇറക്കാമെന്ന് പറഞ്ഞ് പ്രലോഭിപ്പിച്ച്‌ ബൈക്കില്‍ കൊണ്ടുപോയി പീഡിപ്പിച്ചത്. ഹുസൈന്‍ കരിമ്പം എന്ന പേരിലാണ് ഇയാള്‍ പെണ്‍കുട്ടിയുമായി ബന്ധപ്പെട്ടത്. സൈബര്‍സെല്‍ വഴി നടത്തിയ അന്വേഷണത്തിലാണ് പ്രതി വാഹിദാണെന്ന് തിരിച്ചറിഞ്ഞത്. പോലീസ് നടത്തിയ അന്വേഷണത്തില്‍ ഇയാള്‍ തേര്‍ളായി കടവിന് സമീപം ഉണ്ടെന്ന് വ്യക്തമായതോടെ തെരച്ചില്‍ തുടങ്ങിയെങ്കിലും കണ്ടെത്താനായില്ല. ബോട്ട്കടവിന് സമീപത്തെ ഇയാളുടെ ബന്ധുവിന്റെ പൊളിഞ്ഞുകിടക്കുന്ന കടയില്‍ ഒളിച്ചിരിക്കവെയാണ് പോലീസിന്റെ വലയിലായത്.തളിപ്പറമ്പ് എസ് .ഐ. കെ.പി.ഷൈന്‍, എ .എസ്. ഐ എ.ജി.അബ്ദുള്‍റൗഫ്, സീനിയര്‍ സി.പി.ഒമാരായ. സ്‌നേഹേഷ്, ഗിരീഷ്, സി.പി.ഒമാരായ ദിനേഷ്, വിപിന്‍ എന്നിവര്‍ ചേര്‍ന്ന് ഈയാളെ പിടികൂടിയത്.പല പേരുകളിലായി ഈയാള്‍ 46 ഓളം പെണ്‍കുട്ടികളുമായി ചാറ്റിംഗ് നടത്താറുണ്ടെന്ന് പൊലീസ് പറഞ്ഞു. ഒരേസമയം നാല് പെണ്‍കുട്ടികളുമായിട്ട് വാഹിദ് ചാറ്റിംഗ് നടത്താറുണ്ട്. മൂന്ന് ഫോണുകളാണ് ഇയാൾ പെൺകുട്ടികളുമായി ചാറ്റ് ചെയ്യാൻ ഉപയോഗിച്ചിരുന്നത്.പോലീസ് പിടിയിലാകുന്ന സമയത്തും ഇയാൾ പെൺകുട്ടികളോട് ചാറ്റ് ചെയ്തു കൊണ്ടിരിക്കുകയായിരുന്നു.ചാറ്റിങ്ങ് ലിസ്റ്റില്‍ ഉള്‍പ്പെട്ട പല വിദ്യാർത്ഥിനികളേയും പീഡിപ്പിച്ച്‌ അവരുടെ നഗ്നരംഗങ്ങള്‍ മൊബൈലില്‍ പകര്‍ത്തിവെച്ചതും പോലീസ് കണ്ടെത്തിയിട്ടുണ്ട്.ഇയാളുടെ സുഹൃത്തുക്കളില്‍ ചിലരേയും പോലീസ് അന്വേഷിച്ചുവരികയാണ്.ജില്ലക്ക് പുറത്തുള്ള പെണ്‍കുട്ടികളും വാഹിദിന്റെ ചാറ്റിംഗ് വലയില്‍ കുടുങ്ങിയിട്ടുണ്ട്.പോലീസ് ചോദ്യംചെയ്തുവരുന്ന വാഹിദിനെ ഇന്ന് വൈകുന്നേരം കോടതിയില്‍ ഹാജരാക്കും.