തിരുവനന്തപുരം:മെഡിക്കല്‍ കോളജാശുപത്രിയിലെ വനിതാ ഡോക്ടറെ പാര്‍ക്കിംഗ് ഗ്രൗണ്ടില്‍ കാറിനുള്ളില്‍ മരിച്ച നിലയില്‍ കണ്ടെത്തി.മെഡിക്കല്‍ കോളജിലെ സര്‍ജറി വിഭാഗം അസോസിയേറ്റ് പ്രൊഫസര്‍ ശ്രീകാര്യം അലത്തറ ചെമ്പകവിലാസം റോഡില്‍ പ്രണവത്തില്‍ ഡോ. മിനിമോള്‍ (45) നെയാണ് ഇന്നലെ രാത്രിയില്‍ മെഡിക്കല്‍ കോളജാശുപത്രിയിലെ പാര്‍ക്കിംഗ് ഗ്രൗണ്ടില്‍ കാറിനകത്ത് മരിച്ച നിലയില്‍ കണ്ടെത്തിയത്.കാറിനുള്ളില്‍ നിന്നും മരുന്ന് കുത്തിവച്ച നിലയിലുള്ള സിറിഞ്ച് പോലീസ് കണ്ടെടുത്തു. ജീവഹാനി വരുത്തുന്ന വിഷ മരുന്ന് കുത്തിവച്ച്‌ ആത്മഹത്യ ചെയ്തതാകാമെന്നാണ് പോലീസിന്‍റെ നിഗമനം. സിറിഞ്ചും കാറിനുള്ളില്‍ നിന്നും കണ്ടെടുത്ത സാധനങ്ങളും പോലീസ് ഫോറന്‍സിക് പരിശോധനയ്ക്ക് നല്‍കി. മെഡിക്കല്‍ കോളജാശുപത്രിയിലെ കാര്‍ഡിയോളജി വിഭാഗം പ്രൊഫസര്‍ ഡോ. വിനുവിന്‍റെ ഭാര്യയാണ് മരണമടഞ്ഞ മിനിമോള്‍.ഇന്നലെ ഉച്ചയ്ക്ക് ശേഷം ഇവര്‍ വീട്ടില്‍ നിന്നും പുറത്തേക്ക് പോയിരുന്നു. ഏറെ നേരമായും മടങ്ങി വരാതായതോടെ ഇവരെ കാണാനില്ലെന്ന് കാട്ടി ഭര്‍ത്താവ് ഡോ. വിനു ശ്രീകാര്യം പോലീസില്‍ പരാതി നല്‍കിയിരുന്നു. സൈബര്‍സെല്ലിന്‍റെ സഹായത്തോടെ പോലീസ് നടത്തിയ അന്വേഷണത്തില്‍ ഡോ, മിനിമോളുടെ മൊബൈല്‍ ഫോണ്‍ ലൊക്കേഷന്‍ മെഡിക്കല്‍ കോളജ് പാര്‍ക്കിംഗ് ഗ്രൗണ്ട് കാണിച്ചിരുന്നു.ഇതേ തുടര്‍ന്ന് ഇന്നലെ രാത്രിയില്‍ പോലീസും ബന്ധുക്കളും നടത്തിയ തെരച്ചിലിലാണ് മിനിമോളെ കാറിനുള്ളില്‍ മരിച്ച നിലയില്‍ കണ്ടെത്തിയത്. ശ്രീകാര്യം പോലീസ് മേല്‍നടപടി സ്വീകരിച്ചു. മൃതദേഹം പോസ്റ്റ്മോര്‍ട്ടത്തിനായി മോര്‍ച്ചറിയിലേക്ക് മാറ്റി. മരണകാരണം പോസ്റ്റ്മോര്‍ട്ടത്തിന് ശേഷം മാത്രമെ കൃത്യമായി അറിയാന്‍ കഴിയുവെന്നാണ് പോലീസ് പറയുന്നത്. പേട്ട സ്വദേശിനിയാണ് ഡോ. മിനിമോള്‍. മകന്‍ – പ്രണവ്.