തൃശൂർ:തൃശൂര്‍ ചെറുതുരുത്തിയില്‍ ഭര്‍ത്താവ് ഭാര്യയെ വെട്ടിക്കൊന്നു. മുട്ടിക്കുളങ്ങര ചില്‍ഡ്രന്‍സ് ഹോം സൂപ്രണ്ട് ചിത്രയെയാണ്(48) ഭര്‍ത്താവ് മോഹനനന്‍ കൊലപ്പെടുത്തിയത്. രണ്ട് വര്‍ഷമായി മോഹനനും ചിത്രയും അകന്ന് കഴിയുകയായിരുന്നു.വീട്ടില്‍വെച്ചുള്ള ആക്രമണത്തില്‍ ഗുരുതരമായി പരിക്കേറ്റ ചിത്രയെ ഉടന്‍തന്നെ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.ഇരുവരും തമ്മില്‍ നിരന്തരം പ്രശ്നങ്ങൾ ഉണ്ടായിരുന്നതായും കുടുംബ തര്‍ക്കമാണ് കൊലപാതകത്തില്‍ കലാശിച്ചതെന്നും പൊലീസ് അറിയിച്ചു.സംഭവത്തിന് ശേഷം ഒളിവില്‍ പോയ മോഹനനു വേണ്ടി പൊലീസ് തിരച്ചില്‍ ആരംഭിച്ചു. നിലവില്‍ മോഹനനും ചിത്രയും തമ്മില്‍ വിവാഹമോചനക്കേസും നടക്കുന്നുണ്ട്.