തമിഴകത്തിന്റെ പ്രണയ ജോഡികളായ വിജയ്‌യും ജ്യോതികയും നീണ്ട ഇടവേളയ്ക്ക് ശേഷം വീണ്ടും ഒന്നിക്കുന്നു. 14 വര്‍ഷത്തിന് ശേഷമാണ് വിജയ് ജ്യോതിക താരജോഡി ഒരുമിച്ച് അഭിനയിക്കുന്നത്. അറ്റ്ലീയുടെ പുതിയ ചിത്രമായ വിജയ് 61-ലൂടെയാണ് ഇരുവരും ഒരുമിച്ച് സ്ക്രീനിലെത്തുന്നത്.സമാന്തയും കാജലും നായികമാരായെത്തുന്ന ചിത്രത്തിൽ പ്രധാനകഥാപാത്രത്തെയാണ് ജ്യോതിക അവതരിപ്പിക്കുന്നത്.
വിജയ്- അറ്റ്‌ലി കൂട്ടുകെട്ടിൽ പിറന്ന ‘തെരി’ മെഗാഹിറ്റ് ആയതോടെ അടുത്തൊരു ഹിറ്റിനായി ഒന്നിക്കാമെന്ന് തീരുമാനിക്കുകയായിരുന്നു ഇരുവരും. പൂർണമായും അമേരിക്കയിലാണ് വിജയ് 61 ചിത്രീകരിക്കുക. നിരവധി ചിത്രങ്ങളുടെ ഭാഗങ്ങൾ അമേരിക്കയിൽ ചിത്രീകരിച്ചിട്ടുണ്ടെങ്കിലും പൂർണമായും അമേരിക്കയിൽ ചിത്രീകരിക്കുന്ന വിജയ് ചിത്രം ഇതാദ്യമായിരിക്കും. എ ആർ റഹ്മാനാണ് സംഗീതം നൽകു‌ന്നത്.
ഖുഷി, തിരുമലൈ രണ്ട് ചിത്രങ്ങളിലാണ് വിജയ് ജ്യോതിക താരജോഡികള്‍ ഒരുമിച്ചഭിനഭിനയിച്ചത്. ഒരു ആഴ്ചക്കുള്ളിൽ തന്നെ ഒഫീഷ്യൽ ആയി ഇക്കാര്യം അണിയറ പ്രവർത്തകർ പുറത്തുവിടുമെന്ന് തമിഴ് മാധ്യമങ്ങൾ റിപ്പോർട്ട് ചെയ്യുന്നു. 36 വയതനിലെ എന്ന ചിത്രത്തിലൂടെ അഭിനയത്തിലേക്ക് തിരികെ വന്ന ജ്യോതികയുടെ മൂന്നാമത്തെ ചിത്രമാണിത്.
ഹിറ്റ് നായികയായി സിനിമയില്‍ തിളങ്ങി നില്‍ക്കവെയാണ് ജ്യോതിക സൂര്യയെ വിവാഹം ചെയ്തത്. പിന്നീട് കുടുംബ കാര്യങ്ങളുമായി തിരക്കിലായ ജ്യോതികയുടെ സിനിമാ പ്രവേശനത്തിനായി കാത്തിരിക്കുകയായിരുന്നു ആരാധകര്‍. ഹൗ ഓള്‍ഡ് ആര്‍ യൂ എന്ന സൂപ്പര്‍ഹിറ്റ് ചിത്രത്തിന്റെ റീമേക്കായ 36 വയതിനിലൂടെയാണ് ജ്യോതിക തിരിച്ചുവന്നത്. ചിത്രത്തിന് വളരെ മികച്ച പ്രതികരണമാണ് ലഭിച്ചത്.