ന്യൂഡൽഹി:ഉത്തരാഖണ്ഡില്‍ പ്രളയബാധിത പ്രദേശങ്ങളിലേക്ക് അവശ്യവസ്തുക്കളുമായി പോയ ഹെലികോപ്റ്റര്‍ തകർന്ന് മൂന്നുപേർ മരിച്ചു.പൈലറ്റ് രാജ്പാല്‍, സഹപൈലറ്റ് കപ്തല്‍ ലാല്‍, പ്രദേശവാസിയായ രമേശ് സവാര്‍ എന്നിവരാണ് മരിച്ചത്.ഉത്തരകാശി ജില്ലയിലാണ് സംഭവം. സാധനങ്ങള്‍ വിതരണം ചെയ്യുന്നതിനായി ഹെലികോപ്ടര്‍ താഴുന്നതിനിടെ വൈദ്യുത ലൈനില്‍ തട്ടിയാണ് അപകടമുണ്ടായത്.ഉത്തരകാശിയിലെപ്രളയത്തില്‍ കുടുങ്ങി കിടക്കുന്ന ആളുകള്‍ക്ക് ഭക്ഷണവും വെള്ളവും വിതരണം ചെയ്യുന്നതിനായിമോറിയില്‍ നിന്നും പ്രളയ ബാധിത പ്രദേശമായ മോള്‍ഡിയിലേക്ക് പറന്ന ഹെലികോപ്ടറാണ് അപകടത്തില്‍പെട്ടത്. വ്യോമസേനയുടെ രണ്ട് ഹെലികോപ്ടറുകളായിരുന്നു ഈ മേഖലയില്‍ രക്ഷാപ്രവര്‍ത്തനം നടത്തിയിരുന്നത്.ഉത്തരാഖണ്ഡില്‍ പ്രളയം മൂലം റോഡ് ഗതാഗതം തടസപ്പെട്ടതിനാല്‍ ദുരിതബാധിത പ്രദേശങ്ങളിലേക്ക് അവശ്യവസ്തുക്കള്‍ ഹെലികോപ്ടര്‍ മാര്‍ഗമാണ് എത്തിക്കുന്നത്.