കണ്ണൂർ:കീഴാറ്റൂർ ബൈപാസിനെതിരെ വയൽക്കിളികൾ നടത്തിവരുന്ന സമരം അവസാനിപ്പിച്ചതായുള്ള പ്രചാരണം തെറ്റെന്ന് സമരസമിതി നേതാവ് സുരേഷ് കീഴാറ്റൂർ. വയല്‍കിളികള്‍ സമരത്തില്‍ നിന്ന് പിന്‍മാറിയിട്ടില്ലെന്ന് സുരേഷ് വ്യക്തമാക്കി. വയല്‍ കിളി പ്രവര്‍ത്തകരും സുരേഷ് കീഴാറ്റൂരിന്റെ മാതാപിതാക്കളും ഉള്‍പ്പെടെയുള്ളവര്‍ ഭൂമിയുടെ രേഖകള്‍ ബൈപ്പാസിനായി കൈമാറിയെന്നും സമരത്തില്‍ നിന്ന് പിന്‍വാങ്ങുന്നു എന്നുമായിരുന്നു പ്രചാരണം.പ്രചാരണം ശക്തമായതോടെ ഇത് സോഷ്യല്‍ മീഡിയയില്‍ വലിയ ചര്‍ച്ചകള്‍ക്ക് വഴിവെച്ചിരുന്നു.എന്നാല്‍ ബൈപ്പാസിനായി ഭൂമി ഏറ്റെടുത്ത് ത്രിജി വിജ്ഞാപനം ഇറങ്ങിയ ശേഷം ഇതില്‍ ഉള്‍പ്പെട്ടവരുടെ ഭൂമിയുടെ രേഖകൾ പരിശോധിക്കുന്ന പ്രവൃത്തിയാണ് പ്രചാരണത്തിന് ഇടയാക്കിയത്. ത്രിജി വിജ്ഞാപനം വന്നതോടെ ഭൂമി സര്‍ക്കാരിന്റേതായി എന്നത് വസ്തുതയാണെന്നും സുരേഷ് കീഴാറ്റൂര്‍ പറഞ്ഞു.