ന്യൂഡൽഹി:ബീഹാറിൽ ട്രെയിൻ പാളം തെറ്റി ഏഴ് മരണം.ബീഹാറിൽ വൈശാലി ജില്ലയിലാണ് സീമാഞ്ചല്‍ എക്സ്പ്രസ്സ് ട്രെയിൻ പാളം തെറ്റിയത്.അപകടത്തില്‍ 24 പേര്‍ക്ക് പരിക്കേറ്റതായാണ് വിവരം.പാളം തെറ്റിയ ഒന്‍പതു കോച്ചുകളില്‍ മൂന്നെണ്ണം പൂര്‍ണമായും തകര്‍ന്നു. അതിനാല്‍ തന്നെ മരണ സംഖ്യ ഇനിയും ഉയരാന്‍ സാധ്യതയുണ്ടെന്ന് അധികൃതര്‍ പറഞ്ഞു.ബീഹാറിലെ ജോഗ്ബാനിയില്‍ നിന്നും ഡല്‍ഹിയിലെ ആനന്ദ് വിഹാറിലേക്ക് പോവുകയായിരുന്ന സൂപ്പര്‍ഫാസ്റ്റ് ട്രെയിനാണ് പാളം തെറ്റിയത്.അപകടം നടക്കുന്ന സമയത്ത് ട്രെയിൻ അമിത വേഗതയിലായിരുന്നെന്നും ആരോപണമുണ്ട്.ഒരു ജനറല്‍ കംപാര്‍ട്ട്മെന്‍റ്, മൂന്ന് സ്ലീപ്പര്‍ കോച്ചുകള്‍, ഒരു എ.സി കോച്ച് തുടങ്ങി ഒൻപത് കോച്ചുകളാണ് പാളം തെറ്റിയത്. ദുരന്ത നിവാരണ സേനയും ഡോക്ടര്‍മാരും അടങ്ങുന്ന സംഘത്തിന്‍റെ നേതൃത്വത്തിലാണ് രക്ഷാപ്രവര്‍ത്തനം. മരിച്ചവരുടെ കുടുംബത്തിന് അഞ്ച് ലക്ഷം രൂപയും ഗുരുതരമായി പരിക്കേറ്റവര്‍ക്ക് ഒരു ലക്ഷം രൂപയും റെയില്‍വേ നഷ്ടപരിഹാരം പ്രഖ്യാപിച്ചു.