കണ്ണൂർ:പഴയങ്ങാടി വേങ്ങരയിൽ വീട്ടിൽ നിന്നും 12 പവൻ സ്വർണ്ണവും 6000 രൂപയും കവർന്നു.പകൽ സമയത്ത് വീട്ടുകാർ വീടുപൂട്ടി പോയസമയത്താണ് മോഷണം നടന്നത്.സിവിൽ എൻജിനീയറായ പുതിയവീട്ടിൽ രവീന്ദ്രന്റെ വീട്ടിലാണ് കവർച്ച നടന്നത്.ചൊവ്വാഴ്ച പകൽ 12 മണിക്കും 2 മണിക്കും ഇടയിലാണ് സംഭവം.രവീന്ദ്രൻ പഴയങ്ങാടിയിലും ഭാര്യ പയ്യന്നൂരിൽ ജോലിക്കും പോയിരിക്കുകയായിരുന്നു.ഈ സമയത്ത് സ്ഥലത്തെത്തിയ മോഷ്ട്ടാവ് അടുക്കള ഭാഗത്തെ വാതിൽ പൊളിച്ച് അകത്ത് കടക്കുകയായിരുന്നു.കിടപ്പുമുറിയിലെ അലമാരയിൽ സൂക്ഷിച്ചിരുന്ന മാല,വള,മോതിരം,ഡയമണ്ട് കമ്മൽ,പണം എന്നിവയാണ് മോഷ്ട്ടാവ് കവർന്നത്.ഉച്ചയ്ക്ക് രണ്ടുമണിക്ക് ശേഷം രവീന്ദ്രൻ വീട്ടിൽ തിരിച്ചെത്തിയപ്പോഴാണ് മോഷണ വിവരം അറിയുന്നത്.ഉടൻ തന്നെ പഴയങ്ങാടി പോലീസിനെ വിവരമറിയിക്കുകയായിരുന്നു. എസ്‌ഐ പി.എസ് ബിനുമോഹൻ,എഎസ്ഐ എം.ഉണ്ണികൃഷ്ണൻ എന്നിവരുടെ നേതൃത്വത്തിൽ പോലീസും കണ്ണൂരിൽ നിന്നും ഡോഗ് സ്ക്വാർഡും വിരലടയാള വിദഗ്ദ്ധരും സ്ഥലത്തെത്തി പരിശോധന നടത്തി.മൂലക്കീൽ ഇഎംഎസ് വായനശാലയിൽ സ്ഥാപിച്ചരിക്കുന്ന സിസിടിവിയിൽ മോഷ്ട്ടാവിന്റെതെന്ന് സംശയിക്കുന്ന ദൃശ്യം പതിഞ്ഞിട്ടുണ്ട്.ഇയാളുടെ ബാഗിൽ ഉണ്ടായിരുന്ന ഒരു കുപ്പിയും മോഷണം നടന്ന സ്ഥലത്തുനിന്നും കണ്ടെടുത്തിട്ടുണ്ട്. പോലീസ് അന്വേഷണം ആരംഭിച്ചു.