പത്തനംതിട്ട:മലകയറാനെത്തിയ മാധ്യമപ്രവർത്തക പ്രതിഷേധത്തിനൊടുവിൽ തിരിച്ചിറങ്ങി.ന്യൂയോർക് ടൈംസ് റിപ്പോർട്ടർ സുഹാസിനി രാജാണ് സമരക്കാരുടെ പ്രതിഷേധത്തെ തുടർന്ന് തിരിച്ചിറങ്ങിയത്.പമ്ബയില്‍ നിന്ന് മരക്കൂട്ടത്തെത്തിയ ഇവര്‍ക്ക് നേരെ അസഭ്യവര്‍ഷവും കയ്യേറ്റശ്രമവും നടന്നതിനെ തുടര്‍ന്നാണ് യാത്ര മതിയാക്കി മലയിറങ്ങിയത്. പൊലീസ് സംരക്ഷണം നല്‍കിയെങ്കിലും കൂടുതല്‍ പ്രശ്‌നങ്ങള്‍ ഉണ്ടാക്കാതിരിക്കാന്‍ വേണ്ടി തിരിച്ചിറങ്ങുകയായിരുന്നു.ന്യൂയോര്‍ക്ക് ടൈംസിന്റെ ഡല്‍ഹി റിപ്പോര്‍ട്ടറാണ് സുഹാസിനി. പത്രത്തിന് വേണ്ടി ശബരി മല റിപ്പോര്‍ട്ടിങ്ങിനെത്തിയതായിരുന്നു ഇവര്‍. നേരത്തെ പൊലീസ് സംരക്ഷണത്തിലാണ് ഇവര്‍ മലകയറിത്തുടങ്ങിയത്. പ്രതിഷേധക്കാര്‍ റിപ്പോര്‍ട്ടറെ പമ്പയിൽ തടയാന്‍ ശ്രമിച്ചെങ്കിലും റിപ്പോര്‍ട്ടിങ്ങിനെത്തിയതാണെന്ന് ഇവര്‍ പ്രതിഷേധക്കാരോട് വ്യക്തമാക്കിയിരുന്നു.എന്നാൽ മരക്കൂട്ടത്തെത്തിയപ്പോൾ പ്രതിഷേധക്കാർ വീണ്ടും ഇവരെ തടയുകയായിരുന്നു.എന്തു പ്രശ്നമുണ്ടെങ്കിലും മുന്നോട്ടു പോകാന്‍ വഴിയൊരുക്കാമെന്ന് പൊലീസ് അറിയിച്ചെങ്കിലും പിന്‍വാങ്ങാന്‍ അവര്‍ തീരുമാനിക്കുകയായിരുന്നു. നിരോധനാജ്ഞ നിലനില്‍ക്കേയാണ് പ്രതിഷേധക്കാര്‍ അക്രമം നടത്തിയത്.