ന്യൂഡൽഹി:പ്രായഭേദമന്യേ ശബരിമലയിൽ സ്ത്രീകൾക്കും പ്രവേശിക്കാമെന്ന് സുപ്രീം കോടതിയുടെ നിർണായക വിധി.ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിന്റേതാണ് ചരിത്രപ്രധാനമായ ഈ വിധി.കേസ് പരിഗണിച്ച സുപ്രീം കോടതിയിലെ ഭരണഘടനാ ബെഞ്ചില്‍ നാല് പുരുഷ ജഡ്ജിമാരും ഒരു വനിതാ ജഡ്ജിയുമാണ് ഉള്‍പ്പെട്ടിരുന്നത്. ദീപക് മിശ്ര ഉള്‍പ്പെടെയുള്ള പുരുഷ ജഡ്ജിമാര്‍ സ്ത്രീ പ്രവേശനത്തില്‍ അനുകൂല നിലപാടെടുത്തപ്പോള്‍ ഇന്ദു മല്‍ഹോത്ര സ്ത്രീപ്രവേശനത്തോട് വിയോജിച്ചു.ശാരീരിക അവസ്ഥകളുടെ പേരില്‍ സ്ത്രീകളോട് വിവേചനം പാടില്ല, അയ്യപ്പ വിശ്വാസികള്‍ പ്രത്യേക മതവിഭാഗമല്ലെന്നും കോടതി നിരീക്ഷിച്ചു.മതത്തിലെ പുരുഷാധിപത്യം വിശ്വാസത്തിന്റെ പേരില്‍ അടിച്ചേല്‍പ്പിക്കരുതെന്നും വിശ്വാസത്തില്‍ തുല്യതയാണ് വേണ്ടതെന്നും കോടതി വ്യക്തമാക്കി. എട്ടു ദിവസത്തെ വാദം കേൾക്കലിന് ശേഷം ഓഗസ്റ്റ് എട്ടിനാണ് ഭരണഘടനാ ബെഞ്ച് കേസ് വിധിപറയാനായി മാറ്റിവെച്ചത്.2006 ഇൽ ഇന്ത്യൻ യങ് ലോയേഴ്സ് അസോസിയേഷൻ ആണ് ഈ വിഷയവുമായി സുപ്രീം കോടതിയെ സമീപിച്ചത്.തുല്യതയും മതാചാരം അനുഷ്ഠിക്കാനുള്ള അവകാശവും വാഗ്ദാനം ചെയ്യുന്ന ഭരണഘടനാ അനുച്ഛേദങ്ങളുടെ ലംഘനമാണ് പ്രവേശന വിലക്കെന്നായിരുന്നു ഹർജിക്കാരുടെ വാദം. സ്ത്രീകൾക്ക് പ്രായഭേദമന്യേ ക്ഷേത്രത്തിൽ പ്രവേശിക്കാൻ അനുമതി നൽകണമെന്ന് സംസ്ഥാനസർക്കാരും കോടതിയിൽ നിലപാട് വ്യക്തമാക്കിയിരുന്നു.