കണ്ണൂർ:പരിയാരം കാക്കരയിൽ വീട് വൃത്തിയാക്കുന്നതിനിടെയുണ്ടായ സ്ഫോടനത്തിൽ നാലുപേർക്ക് പരിക്ക്.വീട്ടിൽ വാടകയ്ക്ക് താമസിച്ചിരുന്നവർ ഒഴിഞ്ഞു പോയ ശേഷം വീട് വൃത്തിയാക്കുന്നതിനിടെയാണ് വീട്ടുടമയായ സ്ത്രീ ഉൾപ്പെടെ നാലുപേർക്ക് പരിക്കേറ്റത്. വീട്ടുടമസ്ഥ എറണാകുളം സ്വദേശിനി ഗ്രേസി മാത്യുവിന് മുഖത്ത് സാരമായി പരിക്കേറ്റിട്ടുണ്ട്. പരിക്കേറ്റ നാലുപേരെയും പരിയാരം മെഡിക്കൽ പ്രവേശിപ്പിച്ചു.കഴിഞ്ഞ ആറുമാസം മുൻപുവരെ ഇവിടെ വാടകക്കാർ താമസിച്ചിരുന്നു.ഇവർ ഒഴിഞ്ഞു പോയതിനെ തുടർന്ന് വീട് വൃത്തിയാക്കാനും മറ്റുമായാണ് ഗ്രേസി ഇവിടെയെത്തിയത്.അയൽപക്കത്തുള്ള മൂന്നുപേരെയും കൂട്ടി വീട്ടിനുള്ളിലെ പാഴ്‌വസ്തുക്കൾ കൂട്ടിയിട്ട് കത്തിക്കുന്നതിനിടെയാണ് സ്ഫോടനം ഉണ്ടായത്. പോലീസ് സ്ഥലത്തെത്തി അന്വേഷണം ആരംഭിച്ചു.