മുംബൈ:യാത്രക്കാരുടെ മൂക്കിൽ നിന്നും ചെവിയിൽ നിന്നും രക്തം വന്നതിനെ തുടർന്ന് മുബൈയിൽ വിമാനം തിരിച്ചിറക്കി.166 യാത്രക്കാരുമായി മുംബൈയിൽ നിന്നും ജയ്പൂരിലേക്ക് പുറപ്പെട്ട ജെറ്റ് എയർവേയ്സ് വിമാനമാണ് തിരിച്ചിറക്കിയത്.വിമാനത്തിനുള്ളിൽ മർദം നിയന്ത്രിക്കുന്നതിനുള്ള ഉപകരണം ക്യാബിൻ ക്രൂ പ്രവർത്തിപ്പിക്കാൻ മറന്നുപോയതിനെ തുടർന്ന് വിമാനത്തിനുള്ളിൽ മർദ്ദം കുറഞ്ഞുപോയതാണ് രക്തം വരാൻ കാരണം.വ്യാഴാഴ്ച രാവിലെ മുംബൈ വിമാനത്താവളത്തിൽ നിന്നും പറന്നുയർന്ന 9w 697 വിമാനത്തിലാണ് സംഭവം.മർദം കുറഞ്ഞതിനെ തുടർന്ന് ഓക്സിജൻ മാസ്ക്കുകൾ പുറത്തുവരികയും ചെയ്തു.ഇതോടെ യാത്രക്കാർ പരിഭ്രാന്തരായി.മുപ്പതോളം യാത്രക്കാരുടെ മൂക്കിൽ നിന്നും ചെവിയിൽ നിന്നും രക്തം വന്നു.യാത്രക്കാർക്ക് തലവേദനയും അനുഭവപ്പെട്ടു.യാത്രക്കാരെ സുരക്ഷിതരായി തിരിച്ചിറക്കിയതായും എല്ലാവർക്കും ചികിത്സ നൽകിയതായും അധികൃതർ അറിയിച്ചു.സംഭവത്തെ കുറിച്ച് അന്വേഷണം ആരംഭിച്ചതായും കൃത്യവിലോപം കാണിച്ച ജീവനക്കാരെ സസ്പെൻഡ് ചെയ്തതായും ഡയറക്റ്ററേറ്റ് ഓഫ് സിവിൽ ഏവിയേഷൻ അറിയിച്ചു.