മഞ്ചേശ്വരം താലൂക്കിന്റെ പേരുമാറ്റം ഉപേക്ഷിക്കണമെന്നാവശ്യപ്പെട്ട് ധർണയും ഒപ്പു ശേഖരണവും നടത്തുന്നു

കാസർകോഡ്:മഞ്ചേശ്വരം താലൂക്കിന്റെ പേരുമാറ്റം ഉപേക്ഷിക്കണമെന്നാവശ്യപ്പെട്ട് താലൂക്ക് ഓഫീസിനു മുൻപിൽ ധർണയും ഒപ്പു ശേഖരണവും നടത്തുന്നു.മഞ്ചേശ്വരം താലൂക്കിന്റെ പേര് തുളുനാട് താലൂക്ക് എന്നാക്കി മാറ്റുന്നതിനുള്ള ചർച്ചകൾ വകുപ്പ് തലത്തിൽ നടന്നു വരുന്നുണ്ട്. ഇക്കാര്യത്തിൽ കേരള സർക്കാരിന് ലഭിച്ച നിവേദനം റെവന്യൂ F1/390/17 തീയതി 08.12.2017 എന്ന ഫയൽ നമ്പറിൽ റെവന്യൂ സെക്രെട്ടറിയേറ്റിലും LR/M2/16583/17 എന്ന നമ്പറിൽ ലാൻഡ് റെവന്യൂ കമ്മീഷണറേറ്റിലും H2/52628/17 എന്ന നമ്പറിൽ കാസർകോഡ് കളക്റ്ററേറ്റിലും A1/433/18 എന്ന നമ്പറിൽ കാസർകോഡ് RDO ഓഫീസിലും B1/11270/18 എന്ന നമ്പറിൽ മഞ്ചേശ്വരം താലൂക്ക് ഓഫീസിലും നിലവിലുണ്ട്.ഈ വിഷയത്തിൽ മഞ്ചേശ്വരം താലൂക്ക് ഓഫീസിൽ ചർച്ച നടക്കുന്നതാണ്.മഞ്ചേശ്വരം താലൂക്കിനെ ഭാഷാടിസ്ഥാനത്തിൽ അപഗ്രഥിച്ചാൽ ഇവിടെ 58 ശതമാനവും മലയാളികളാണ്.എന്നിട്ടും മലയാളം പഠിപ്പിക്കാത്ത 53 വിദ്യാലയങ്ങൾ ഇവിടെ നിലനിൽക്കെയാണ് പുതിയ നീക്കം.ഇതിൽ പ്രതിഷേധിച്ചാണ് സെപ്റ്റംബർ ഒന്നാം തീയതി ശനിയാഴ്ച രാവിലെ പത്തുമണിക്ക് ഉപ്പളയിലെ മഞ്ചേശ്വരം താലൂക്ക് ഓഫീസിനു മുൻപിൽ ധർണ നടത്താനും പഞ്ചായത്ത് ആസ്ഥാനങ്ങളിൽ ഒപ്പുമരചുവട്ടിൽവെച്ച് ഒപ്പു ശേഖരണം നടത്തി മുഖ്യമന്ത്രിക്ക് ഭീമഹർജി സമർപ്പിക്കാനും മഞ്ചേശ്വരം താലൂക്ക് കേരള ഭരണഭാഷ വികസന സമിതി തീരുമാനിച്ചിരിക്കുന്നത്.