കണ്ണൂർ:കനത്ത മഴയെ തുടർന്ന് കക്കാട്,വളപട്ടണം പുഴകൾ കരകവിഞ്ഞു.മിക്ക റോഡുകളും വെള്ളത്തിനടിയിലായി.വ്യാപക കൃഷിനാശവുമുണ്ടായി. വാഹനഗതാഗതവും ഭാഗികമായി മുടങ്ങി.കക്കാട് പുഴ കരകവിഞ്ഞൊഴുകി കക്കാട്-പള്ളിപ്രം റോഡ്,പള്ളിപ്രം-കരിക്കൻകണ്ടിച്ചിറ റോഡ്,കക്കാട്-കുഞ്ഞിപ്പള്ളി റോഡ് എന്നിവിടങ്ങളിലെല്ലാം വെള്ളം കയറി. തുടർന്ന് ഇതുവഴിയുള്ള ചെറിയ വാഹനങ്ങളെല്ലാം വഴിതിരിച്ചു വിടുകയായിരുന്നു. പുഴയും റോഡും തിരിച്ചറിയാനാകാത്ത വിധം വെള്ളം കയറിയതിനാൽ കാൽനട യാത്രയും ദുഷ്ക്കരമായി.വളപട്ടണം പുഴ കരകവിഞ്ഞൊഴുകി പാവന്നൂർ കടവ് റോഡിൽ വെള്ളം കയറി.ഇതോടെ ചൂളിയാട്,ഇരിക്കൂർ ഭാഗത്തേക്കുള്ള വാഹനഗതാഗതം നിലച്ചു.ഈ പ്രദേശങ്ങളിൽ വ്യാപക കൃഷി നാശവുമുണ്ടായി.