മാഹി:പള്ളൂരിലെ സിപിഎം പ്രവർത്തകൻ കണ്ണിപ്പൊയിൽ ബാബുവിന്റെ കൊലപാതകവുമായി ബന്ധപ്പെട്ടബന്ധപ്പെട്ട് രണ്ട് ആർഎസ്എസ് പ്രവർത്തകർ കൂടി അറസ്റ്റിൽ.പള്ളൂർ നാലുതറ പെർമെന്റവിടെ എം.ശ്രീജിത്ത്(38),ഈസ്റ്റ് പള്ളൂരിലെ കുന്നത്ത് വീട്ടിൽ പ്രണവ്(22) എന്നിവരാണ് അറസ്റ്റിലായത്.മാഹി സർക്കിൾ ഇൻസ്പക്റ്റർ ഷണ്മുഖത്തിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് ഇവരെ പിടികൂടിയത്.ഇതോടെ കേസിൽ അറസ്റ്റിലായ ആർഎസ്എസ് പ്രവർത്തകരുടെ എണ്ണം പത്തായി.ബാബുവിനെ കൊല്ലാൻ തയ്യാറായി നിൽക്കുന്നവർക്ക് അദ്ദേഹം വരുന്ന വിവരവും സമയവും ഫോണിലൂടെ കൈമാറിയതും കൊലയ്ക്ക് ശേഷം ആയുധങ്ങൾ ഒളിപ്പിച്ചതും ഇവരാണെന്ന് പോലീസ് പറഞ്ഞു.കേസിൽ ആദ്യം അറസ്റ്റിലായ നിജേഷ് കുറ്റസമ്മതം നടത്തിയതോടെയാണ് കൊലപാതകത്തിൽ ഉൾപ്പെട്ട മറ്റുള്ളവരെ കുറിച്ചുള്ള വിവരം പൊലീസിന് ലഭിച്ചത്.ഇനി ഒരു പ്രതി കൂടി പിടിയിലാകാനുണ്ട്. മുൻ കൗൺസിലർ കൂടിയായ ബാബുവിനെ മെയ് ഏഴിന് രാത്രിയാണ് ഇരട്ട പിലാക്കൂൽ-നടവയൽ റോഡിൽ ബാബുവിന്റെ വീടിനു സമീപത്തുവെച്ചു തന്നെ വെട്ടിക്കൊലപ്പെടുത്തിയത്.