എറണാകുളം:എറണാകുളം മഹാരാജാസ് കോളേജിൽ എസ്എഫ്ഐ നേതാവ് അഭിമന്യു കൊല്ലപ്പെട്ട സംഭവവുമായി ബന്ധപ്പെട്ട് രണ്ടു വിദ്യാർത്ഥികളെ സസ്‌പെൻഡ് ചെയ്തു.പൊലീസില്‍ നിന്ന് ആക്രമണത്തിലുള്‍പ്പെട്ട രണ്ട് വിദ്യാര്‍ത്ഥികളുടെ പേര് ലഭിച്ചിട്ടുണ്ട്. മൂന്നാം വര്‍ഷ അറബിക് വിദ്യാര്‍ത്ഥി മുഹമ്മദ് പ്രവേശനം നേടാനിരിക്കുന്ന ഫാറൂഖ് എന്നിവരെയാണ് സസ്പെന്‍ഡ് ചെയ്തത്. മഹരാജാസ് കോളജ് പ്രിന്‍സിപ്പലാണ് സസ്‌പെന്‍ഷന്‍ വിവരം അറിയിച്ചത്. നാളെ മുതല്‍ കോളേജ് തുറക്കുമെന്നും പ്രിൻസിപ്പൽ അറിയിച്ചു.കോളജിലെ ഒന്നാം വര്‍ഷ ക്ലാസുകള്‍ തിങ്കളാഴ്ച ആരംഭിക്കും. സംഘര്‍ഷത്തില്‍ പരിക്കേറ്റ അര്‍ജുന് ചികിത്സാ സഹായം നല്‍കും. അഭിമന്യുവിന്റെ കുടുംബത്തിന് രണ്ടു ലക്ഷം രൂപ നല്‍കുമെന്നും പ്രിന്‍സിപ്പല്‍ വ്യക്തമാക്കി. നവാഗതരെ സ്വാഗതം ചെയ്യുന്നതിനുള്ള ഒരുക്കങ്ങള്‍ക്കായാണ് ഞായറാഴ്ച രാത്രി തന്നെ അഭിമന്യു ഇടുക്കി വട്ടവടയിലെ വീട്ടില്‍ നിന്ന് ക്യാംപസിലെത്തിയത്. എന്നാല്‍, ചുവരെഴുത്ത് സംബന്ധിച്ച എസ്എഫ്ഐ-ക്യാംപസ് ഫ്രണ്ട് തര്‍ക്കം അഭിമന്യുവിന്റെ കൊലയില്‍ കലാശിക്കുകയായിരുന്നു.