താമരശേരി: കോഴിക്കോട് കട്ടിപ്പാറ പഞ്ചായത്തിലെ കരിഞ്ചോലയിലുണ്ടായ ഉരുൾപൊട്ടലിൽ മരിച്ചവരുടെ എണ്ണം മൂന്നായി. കരിഞ്ചോല സ്വദേശി അബ്ദുൾ സാലീമിന്‍റെ മക്കളായ ദിൽന(9)യും സഹോദരനും മറ്റൊരു കുട്ടിയുമാണ് മരിച്ചത്. അതേസമയം കാണാതായ ഒരു കുട്ടിയെ കൂടി രക്ഷാപ്രവർത്തകർ പുറത്തെടുത്തു. കാണാതായ എട്ട് പേർക്കുവേണ്ടിയുള്ള തെരച്ചിൽ പുരോഗമിച്ചു വരികയാണ്. രണ്ട് കുടുംബങ്ങളിലെ ആളുകളെയാണ് കാണാതായിരിക്കുന്നത്. ഹസൻ, അബ്ദുൾ റഹ്മാൻ എന്നിവരുടെ കുടുംബങ്ങളെയാണ് കാണാതായത്.ഹസന്റെ കുടുംബത്തില ഏഴ് പേരെയാണ് കാണാതായിരിക്കുന്നത്. അബ്ദുള്‍റഹ്മാന്റെ കുടുംബത്തിലെ നാലുപേരെയും കാണാതായി.ഇന്ന് പുലർച്ചെ മൂന്നിനായിരുന്നു സംഭവം. നാട്ടുകാരും പോലീസും അഗ്നിശമനസേന ഉദ്യോഗസ്ഥരും ചേർന്നു രക്ഷാപ്രവർത്തനങ്ങൾ നടത്തിവരികയാണ്. എന്നാൽ തുടർച്ചയായി പെയ്യുന്ന മഴ രക്ഷാപ്രവർത്തനങ്ങൾക്കു തടസം സൃഷ്ടിക്കുന്നുണ്ട്.