കനൗജ്:യു പിയിൽ ബസ് പാഞ്ഞു കയറി ആറു വിദ്യാർത്ഥികളും ഒരധ്യാപകനും മരിച്ചു. വിദ്യാര്‍ഥികളടക്കം ഒൻപതു പേരുടെ ദേഹത്തുകൂടെയാണ് ബസ് കയറിയിറങ്ങിയത്. ആറു പേര്‍ സംഭവ സ്ഥലത്തും ഒരാള്‍ ആശുപത്രിയില്‍ വച്ചും മരിച്ചു. രണ്ടു പേര്‍ ഗുരുതരാവസ്ഥയില്‍ ചികിത്സയിലാണ്.ഉത്തര്‍പ്രദേശ് ആഗ്ര- ലക്നോ എക്സ്പ്രസ്വേയില്‍ കനൗജിനടുത്ത് പുലര്‍ച്ചെ നാലിനാണ് സംഭവം.സന്ത് കബീര്‍ നഗര്‍ ജില്ലയില്‍ നിന്ന് ഹരിദ്വാരിലേക്ക് പോകുകയായിരുന്നു വിദ്യാര്‍ഥികളടങ്ങിയ സംഘം. മുഖ്യമന്ത്രി യോഗി ആദിത്യനാഥ് സംഭവത്തില്‍ മരിച്ചവരുടെ ബന്ധുക്കള്‍ക്ക് രണ്ട് ലക്ഷം രൂപ നഷ്ടപരിഹാരം പ്രഖ്യാപിച്ചു. പരിക്കേറ്റവര്‍ക്ക് 50,000 രൂപ വീതം നല്‍കും.