തിരുവനന്തപുരം: സംസ്ഥാനത്ത് പടർന്നു പിടിക്കുന്ന നിപ്പാ വൈറസ് ബാധയെ പഠിക്കുന്നതിന് കേന്ദ്രം നിയോഗിച്ച പ്രത്യേക സംഘം ഇന്ന് കോഴിക്കോട്ടെത്തും. വൈറസ് ബാധിച്ച് ഇന്നും ഒരാൾ മരിച്ചു. പനി ബാധിച്ചവരെ പരിചരിച്ച പേരാമ്പ്ര താലൂക്ക് ആശുപത്രിയിലെ നഴ്സ് ലിനിയാണ് മരിച്ചത്. ഇതോടെ വൈറസ് ബാധ മൂലം മരിച്ചവരുടെ എണ്ണം പത്തായി. വവ്വാലുകളുടെ സ്പർശനമേറ്റ പഴങ്ങളിൽ നിന്നും മറ്റും നേരിട്ട് മനുഷ്യരിലേക്ക് ഈ വൈറസ് കടക്കാം.രോഗം ബാധിച്ച മനുഷ്യരിൽ നിന്നും മറ്റുള്ളവരിലേക്കും വൈറസ് പടരും.ഇതിനെതിരെയുള്ള വാക്‌സിൻ കണ്ടെത്തിയിട്ടില്ല.പനി,തലവേദന,ശ്വാസതടസ്സം, എന്നിവയോടെ തുടങ്ങി മസ്തിഷ്‌കജ്വരത്തിലെത്തുന്നതാണ് ഇതിന്റെ ലക്ഷണങ്ങൾ.രോഗബാധ ഉണ്ടായാലും ലക്ഷണങ്ങൾ വ്യക്തമാകാൻ പിന്നെയും ദിവസങ്ങളെടുക്കും. ചുമ,വയറുവേദന,മനംപിരട്ടൽ, ഛർദി,ക്ഷീണം, കാഴ്ചമങ്ങൾ എന്നീ ലക്ഷണങ്ങളൂം ഉണ്ടാകും.രോഗലക്ഷങ്ങൾ ആരംഭിച്ച ഒന്നുരണ്ടു ദിവസങ്ങൾക്കകം കോമ അവസ്ഥയിലെത്താൻ സാധ്യതയുണ്ട്.തലച്ചോറിനെ ബാധിക്കുന്ന എൻസഫലൈറ്റിസ് ഉണ്ടാകാനും സാധ്യതയുണ്ട്.വവ്വാൽ,പക്ഷികൾ എന്നിവ കടിച്ച പഴങ്ങൾ ഉപയോഗിക്കരുത്.മാമ്പഴം പോലുള്ള പഴങ്ങൾ പുറമെ സോപ്പ് ഉപയോഗിച്ച് കഴുകിയ ശേഷം ഉപയോഗിക്കുക.വവ്വാൽ ധാരാളമുള്ള സ്ഥലങ്ങളിൽ നിന്നും ശേഖരിക്കുന്ന കള്ള് ഉപയോഗിക്കരുത്.രോഗിയുടെ ശരീര സ്രവങ്ങളിൽ നിന്നുമാണ് വൈറസ് പകരുന്നത്.അതിനാൽ രോഗിയെ പരിചരിക്കുന്നവർ ഗ്ലൗസ്,മാസ്ക് എന്നിവ ഉപയോഗിക്കണം.