കണ്ണൂർ:ജില്ലയിൽ ഇ-പോസ് മെഷീൻ ഉപയോഗിച്ച് റേഷൻ വിതരണം ചെയ്യുന്നതിനുള്ള നടപടിക്രമങ്ങൾ അവസാനഘട്ടത്തിലേക്ക്.ഈ മാസം പത്താം തീയതി മുതൽ ജില്ലയിലെ മുഴുവൻ റേഷൻ കടകളിലെയും റേഷൻ വിതരണം ഇ പോസ് മെഷീൻ വഴിയാകും. ആദ്യഘട്ടത്തിൽ മാർച്ചിൽ കണ്ണൂർ താലൂക്കിലെ 45 റേഷൻ കടകളിൽ ഇ.പോസ് മെഷീൻ വഴി റേഷൻ വിതരണം നടത്തിയിരുന്നു.റേഷൻ കാർഡ് അംഗങ്ങളുടെ വിരലടയാളം ആധാറുമായി ബന്ധിപ്പിച്ച് റേഷൻ അനുവദിക്കുന്ന പദ്ധതിയാണ് ഇ-പോസ്. ആധാർ വഴി ഉപഭോക്താവിനെ തിരിച്ചറിഞ്ഞാൽ കാർഡിന് അർഹമായ ഭക്ഷ്യ ധാന്യങ്ങളുടെ അളവ്,വില എന്നിവ സ്‌ക്രീനിൽ തെളിയും.ആവശ്യമായ അളവ് രേഖപ്പെടുത്തിക്കഴിയുമ്പോൾ മെഷീനിലൂടെ ബില് ലഭിക്കും. റേഷൻ വിതരണം സംബന്ധിച്ച ശബ്ദരൂപത്തിൽ അറിയിപ്പും ലഭിക്കും.ഉപഭോക്താക്കൾ തങ്ങളുടെ മൊബൈൽ നമ്പർ റേഷൻ കാർഡുമായി ബന്ധിപ്പിച്ചിട്ടുണ്ടെങ്കിൽ റേഷൻ വിഹിതം സംബന്ധിച്ച എസ്എംഎസ് സന്ദേശവും ലഭിക്കും. ഇ-പോസ് മെഷീൻ നിലവിൽ വരുന്നതോടെ ജില്ലയിലെ മുഴുവൻ റേഷൻ കടകളിലെയും ഭക്ഷ്യധാന്യ വിതരണ വിവരങ്ങൾ നെറ്റ് വർക്കിലൂടെ നിരീക്ഷിക്കാൻ സിവിൽ സപ്ലൈ വകുപ്പിന് സാധിക്കും. ഇതോടെ ജില്ലയിലെ റേഷൻ വിതരണം കൂടുതൽ സുതാര്യമാകും.ഇ-പോസ് സംവിധാനം നിലവിൽ വരുന്നതിനാൽ ആധാർ നമ്പർ റേഷൻ കാർഡുമായി ബന്ധിപ്പിക്കാത്ത മുഴുവൻ റേഷൻ ഉപഭോക്താക്കളും ഈ മാസം പത്തിനകം ഇതിനായുള്ള നടപടി ക്രമങ്ങൾ പൂർത്തിയാക്കണമെന്ന് ജില്ലാ സപ്ലൈ ഓഫീസർ അറിയിച്ചു.