കൊച്ചി:വാരാപ്പുഴയിൽ കസ്റ്റഡിയിലായിരിക്കെ പ്രതി കൊല്ലപ്പെട്ട സംഭവത്തിൽ അറസ്റ്റിലായ പൊലീസുകാരെ ഇന്ന് കോടതിയിൽ ഹാജരാക്കും.ആർടിഎഫിലെ മൂന്നു പോലീസ് ഉദ്യോഗസ്ഥരെയാണ് ഇന്ന് പറവൂർ മുൻസിഫ് കോടതിയിൽ ഹാജരാക്കുക.ബുധനാഴ്ച രാത്രിയാണ് കളമശ്ശേരി എ ആർ ക്യാമ്പിലെ പോലീസുകാരായ ജിതിൻ രാജ്,സന്തോഷ് കുമാർ,സുമേഷ് എന്നിവരെ അറസ്റ്റ് ചെയ്തത്.എറണാകുളം റൂറൽ എസ്പിയുടെ പ്രത്യേക സ്ക്വാഡായ റൂറൽ ടൈഗർ ഫോഴ്സിലെ അംഗങ്ങളായ ഇവരാണ് ശ്രീജിത്തിനെ വീട്ടിൽ നിന്നും കസ്റ്റഡിയിലെടുത്തത്. ബുധനാഴ്ച ഇവരെ ആലുവ പോലീസ് ക്ലബിൽ വിളിച്ചുവരുത്തി ചോദ്യം ചെയ്ത ശേഷം രാത്രി ഏഴരമണിയോടെ അറസ്റ്റ് രേഖപ്പെടുത്തുകയായിരുന്നു.കൊലക്കുറ്റം,അന്യായമായി തടങ്കലിൽ വെയ്ക്കൽ,തുടങ്ങിയ കുറ്റങ്ങളാണ് ഇവർക്കുമേൽ ചുമത്തിയതെന്നാണ് സൂചന.കേസുമായി ബന്ധപ്പെട്ട് വരും ദിവസങ്ങളിൽ കൂടുതൽ അറസ്റ്റ് ഉണ്ടായേക്കുമെന്ന് അന്വേഷണ ഉദ്യോഗസ്ഥർ സൂചിപ്പിച്ചിരുന്നു.