കണ്ണൂർ: കണ്ണൂര്‍ ജില്ലയില്‍ ഡിജിറ്റല്‍ സാക്ഷരത സജീവമാക്കാനും സര്‍ക്കാരിന്‍റെ ഓണ്‍ലൈന്‍ സേവനങ്ങള്‍ പരമാവധി ജനങ്ങളിലെത്തിക്കാനും കര്‍മപദ്ധതി തയാറായി. ഇതിന്‍റെ ഭാഗമായി ജില്ലയുടെ ഔദ്യോഗിക മൊബൈല്‍ ആപ്ലിക്കേഷനായ വി.ആര്‍. കണ്ണൂര്‍ എന്ന ആപ്പിന്‍റെ വ്യാപനത്തിനും ഓണ്‍ലൈന്‍ സേവനങ്ങളുടെ ഏകോപനത്തിനും പ്രാദേശികാടിസ്ഥാനത്തിലുള്ള ബോധവത്കരണത്തിനുമായി ഡിജിറ്റല്‍ കര്‍മ സേനയ്ക്ക് രൂപം നല്‍കി.സര്‍ക്കാര്‍ ഓഫീസുകളിലെ ഐടി പ്രഫഷനലുകളും അക്ഷയ കോമണ്‍ സര്‍വീസ് കേന്ദ്രങ്ങളുടെ സംരംഭകരും സന്നദ്ധ പ്രവര്‍ത്തകരും ഉള്‍ക്കൊള്ളുന്നതാണ് ഡിജിറ്റല്‍ കര്‍മ സേന. ജില്ലാ ഇ-ഗവേണന്‍സ് സൊസൈറ്റി, ജില്ലാ ഭരണകൂടം, നാഷണല്‍ ഇന്‍ഫര്‍മാറ്റിക് സെന്റര്‍, സംസ്ഥാന ഐടി മിഷന്‍, കേന്ദ്ര ഐ.ടി വകുപ്പിന് കീഴിലെ ഓണ്‍ലൈന്‍ പോര്‍ട്ടലായ വികാസ് പീഡിയ കേരള, നോഡല്‍ ഏജന്‍സിയായ വയനാട് സോഷ്യല്‍ സര്‍വീസ് സൊസൈറ്റി എന്നിവ ചേര്‍ന്നാണ് കര്‍മ സേന രൂപീകരിച്ചത്.കോ-ഓർഡിനേഷന്‍, ബോധവത്കരണം, സാങ്കേതിക സഹായം, സമൂഹ മാധ്യമങ്ങള്‍ എന്നിങ്ങനെ നാലു വിഭാഗങ്ങളിലായി എൺപതോളം പേര്‍ അടങ്ങുന്നതാണ് കര്‍മ സേന. ജില്ലാ കളക്ടർ മിര്‍ മുഹമ്മദ് അലിയുടെ നേതൃത്വത്തില്‍ ജില്ലാ ഇന്‍ഫര്‍മാറ്റിക്സ് ഓഫീസര്‍ ആന്‍ഡ്രൂസ് വര്‍ഗീസ്, ജില്ലാ ഇഗവേണന്‍സ് സൊസൈറ്റി ഡിസ്ട്രിക്ട് പ്രോജക്ട് മാനേജര്‍ സി.എം. മിഥുന്‍ കൃഷ്ണ, വികാസ് പീഡിയ സ്റ്റേറ്റ് കോഓർഡിനേറ്റര്‍ സി.വി. ഷിബു എന്നിവരാണ് കര്‍മസേനയ്ക്ക് മേല്‍നോട്ടം വഹിക്കുക.