മട്ടന്നൂർ:എടയന്നൂരിൽ യൂത്ത് കോൺഗ്രസ് റാലിക്ക് നേരെ ഉണ്ടായ കല്ലേറിൽ കോൺഗ്രസ് പ്രവർത്തകന് പരിക്കേറ്റു.എടയന്നൂർ തെരൂരിലെ സി.പ്രദീപനാണ് പരിക്കേറ്റത്.ഇയാളെ തലശ്ശേരി ഇന്ദിരാഗാന്ധി ആശുപത്രിയിൽ പ്രവേശിപ്പിച്ചു.എടയന്നൂരിലെ യൂത്ത് കോൺഗ്രസ് പ്രവർത്തകൻ ശുഹൈബിന്റെ കൊലപാതകത്തിൽ പ്രതിഷേധിക്കുന്നതിനായി ഡിസിസി പ്രസിഡന്റ് സതീശൻ പാച്ചേനി നയിച്ച നവദർശന യാത്രയുടെ ഭാഗമായി കോൺഗ്രസ് സ്ഥാപിച്ച കൊടിമരം നശിപ്പിച്ചിരുന്നു.ഇതിൽ പ്രതിഷേധിച്ച് നടത്തിയ പ്രകടത്തിനു നേരെയാണ് കല്ലേറുണ്ടായത്. പ്രകടനത്തിന് നേരെ സിപിഎം പ്രവർത്തകർ കല്ലെറിയുകയായിരുന്നുവെന്നും ചിതറിയോടിയ കോൺഗ്രസ് പ്രവർത്തകരെ അക്രമിച്ചതായും കോൺഗ്രസ് ആരോപിച്ചു.അതേസമയം സംഭവവുമായി യാതൊരു ബന്ധവുമില്ലെന്ന് സിപിഎം പ്രാദേശിക നേതൃത്വം ആരോപിച്ചു. സംഭവത്തെ തുടർന്ന് സ്ഥലത്ത് കോൺഗ്രസ്-സിപിഎം സംഘർഷം രൂക്ഷമായിരിക്കുകയാണ്. മട്ടന്നൂർ എസ്‌ഐ കെ.രാജീവ് കുമാറിന്റെ നേതൃത്വത്തിലുള്ള പോലീസ് സംഘം സ്ഥലത്ത് ക്യാമ്പ് ചെയ്യുന്നുണ്ട്.