മട്ടന്നൂർ:ജീപ്പിൽ കടത്തുകയായിരുന്ന സ്ഫോടക വസ്തുക്കളുമായി രണ്ടുപേർ മട്ടന്നൂർ പോലീസിന്റെ പിടിയിലായി.തമിഴ്നാട്ടെ തിരുവണ്ണാമലൈ കോടിക്കുപ്പത്തെ ചെട്ടിയാർ സ്ട്രീറ്റിൽ കെ.എളുമലൈ (37), മയ്യിൽ പാവ്വന്നൂർ മൊട്ടയിലെ പി.പി.ഹരീഷ് (34) എന്നിവരെയാണ് മട്ടന്നൂർ എസ് ഐ കെ.രാജീവ് സംഘവും അറസ്റ്റു ചെയ്തത്. തമിഴ്നാട്ടിൽ നിന്നും ഇരിക്കൂർ ഭാഗത്തേക്ക് കടത്തികൊണ്ടു പോകുന്ന സ്ഫോടക വസ്തുക്കളാണ് പിടികൂടിയത്.ഇവർ സഞ്ചരിച്ച ജീപ്പിൽ നിന്നും 49 ഡിറ്റണേറ്ററുകളും 21 ജെലാറ്റിൻ സ്റ്റിക്കുകളും പിടികൂടി.സ്ഫോടക വസ്തുവും ജീപ്പും പോലീസ് കസ്റ്റഡിയിലെടുത്തിട്ടുണ്ട്.വെള്ളിയാഴ്ച രാത്രി വെള്ളിയാംപറമ്പിൽ വെച്ച് വാഹനപരിശോധനയ്ക്കിടെയാണ് ഇവർ പിടിയിലായത്.ജീപ്പിനുള്ളിൽ പ്ലാസ്റ്റിക്ക് കവറിൽ ഒളിപ്പിച്ചുവെച്ച നിലയിലായിരുന്നു സ്ഫോടക വസ്തുക്കളെന്ന് പോലീസ് പറഞ്ഞു. മട്ടന്നൂരിൽ നിന്നും ഇരിക്കൂർ ഭാഗത്തേക്ക് കടത്തിക്കൊണ്ടുപോവുകയായിരുന്നു ഇവ.മട്ടന്നൂർ മേഖലയിൽ ചിലയിടങ്ങളിൽ രാത്രി കാലങ്ങളിൽ സ്ഫോടനമുണ്ടാകുന്നതിനാൽ പോലീസ് ഇവിടെ പരിശോധന ശക്തിപ്പെടുത്തിയിട്ടുണ്ട്.