ഹൈദരാബാദ്:രാഷ്ട്രീയത്തിൽ ഉൾപ്പെടെ വിവിധമേഖലകളിൽ അഴിമതി വേരോടെ പിഴുതെറിയുന്നതിനായി 2000, 500 രൂപ നോട്ടുകള്‍ റദ്ദാക്കണമെന്ന് ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു ആവശ്യപ്പെട്ടു.അമരാവതിയിൽ ആന്ധ്രാപ്രദേശ് സംസ്ഥാന നിയമസഭയിൽ നടന്ന സംവാദത്തിനു മറുപടി പറയുകയായിരുന്നു അദ്ദേഹം.ക്യാഷ്‌ലെസ്സ് ഇടപാടുകൾ പരമാധി പ്രോത്സാഹിപ്പിക്കണെമെന്നും തന്റെ സംസ്ഥാനം ഇത്തരത്തിലുള്ള ഇടപാടുകൾ കൂടുതല്‍ പ്രോത്സാഹിപ്പിക്കുമെന്നും നിയമസഭയില്‍ നടന്ന ചര്‍ച്ചയില്‍ അദ്ദേഹം പറഞ്ഞു.നോട്ട് റദ്ദാക്കലിനെ തുടര്‍ന്ന് പണരഹിത സാമ്പത്തിക മേഖലയെ പ്രോത്സാഹിപ്പിക്കുന്നതിനായി നീതി ആയോഗ് രൂപം നല്‍കിയ 13 അംഗ സമിതിയുടെ ചെയര്‍മാനായിരുന്നു ചന്ദ്രബാബു നായിഡു.ഉയർന്ന മൂല്യമുള്ള നോട്ടുകൾ പിൻവലിക്കണമെന്ന് ആവശ്യപ്പെടുന്ന രാജ്യത്തെ ആദ്യത്തെ മുഖ്യമന്ത്രി താനാണെന്നും 2000,500 രൂപ നോട്ടുകള്‍ പിൻവലിക്കുന്നത് വഴി വോട്ടിനു പകരം പണം നൽകുക എന്ന വ്യവസ്ഥ അവസാനിക്കുമെന്നും കുറഞ്ഞ മൂല്യമുള്ള നോട്ടുകൾ കൂടുതലായി ഒരു രാഷ്ട്രീയക്കാരനും കൊണ്ടുനടക്കാനാകില്ലെന്നും അദ്ദേഹം പറഞ്ഞു.സംസ്ഥാനത്തിന്റെ വികസന പ്രവർത്തനങ്ങൾക്കായി തന്റെ നേതൃത്വത്തിലുള്ള ഗവണ്മെന്റ് രാപ്പകൽ പരിശ്രമിക്കുകയാണ്.എന്നാൽ തിരഞ്ഞെടുപ്പിന് തൊട്ടുമുൻപായി മുംബൈയിൽ നിന്നോ ബാംഗ്ലൂരിൽ നിന്നോ പണവുമായി ആളുകളെത്തുന്നു.നാം എന്തിനു അവരെ ഭയക്കണം,നാം നടത്തിയ സേവനങ്ങൾക്ക് അടിസ്ഥാനമായാണ് വോട്ട് നേടേണ്ടതെന്നും അദ്ദേഹം വ്യക്തമാക്കി. അടുത്ത നിയമസഭാ തിരഞ്ഞെടുപ്പ് ലക്ഷ്യമാക്കി ടിഡിപി 175 മണ്ഡലങ്ങളിലേക്കായി 25 കോടി രൂപ ഒഴുക്കിയിട്ടുണ്ടെന്ന തെലുങ്ക് സിനിമാതാരവും ജന സേന പാര്‍ട്ടി നേതാവുമായ പവന് കല്യാണിന്റെ ആരോപണങ്ങൾക്ക് മറുപടി പറയുകയായിരുന്നു അദ്ദേഹം.താൻ ഇത്തരത്തിൽ നിയോജകമണ്ഡലങ്ങളിൽ പണമൊഴുക്കിയിട്ടുണ്ടെങ്കിൽ ഉയർന്ന മൂല്യമുള്ള നോട്ടുകൾ നിരോധിക്കുന്നതിലൂടെ അത് ഉപയോഗശൂന്യമാകുമെന്നും അദ്ദേഹം പറഞ്ഞു.