ന്യൂഡൽഹി:ആധാർ കാർഡിനായി ശേഖരിച്ച ബയോമെട്രിക് വിവരങ്ങൾ സുരക്ഷിതമാണെന്ന് യുണിക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ സുപ്രീം കോടതിയിൽ വ്യക്തമാക്കി. ഭരണഘടനാ ബെഞ്ചിന് മുൻപിൽ നടന്ന പവർ പോയിന്റ് പ്രെസൻറ്റേഷനിലൂടെയാണ് യുഐഡിഎഐ സിഇഒ അജയ് ഭൂഷൺ ഇക്കാര്യം അവതരിപ്പിച്ചത്. പ്രപഞ്ചം അവസാനിക്കുവോളം കാലം ആധാർ വിവരങ്ങൾ സുരക്ഷിതമാണെന്ന് യുഐഡിഎഐ വ്യക്തമാക്കി.2048 എൻക്രിപ്ഷൻ കീ ഉപയോഗിച്ചാണ് ആധാർ വിവരങ്ങൾ സൂക്ഷിച്ചിരിക്കുന്നത്. അന്വേഷണ ഏജൻസികൾക്കുപോലും ആധാർ വിവരങ്ങൾ കൈമാറിയിട്ടില്ലെന്നും യുഐഡിഎഐ ചൂണ്ടിക്കാട്ടി.എന്നാൽ ദേശീയ സുരക്ഷയുമായി ബന്ധപ്പെട്ട വിഷയങ്ങളിൽ പൗരന്റെ ആധാർ വിവരങ്ങൾ കൈമാറുമെന്നും കൂട്ടിച്ചേർത്തു. ആധാറിനായി ജാതി,മതം എന്നീ വിവരങ്ങൾ ശേഖരിക്കുന്നില്ല.പൗരന്റെ അനുമതിയില്ലാതെ വിവരങ്ങൾ ശേഖരിക്കില്ലെന്നും അജയ് ഭൂഷൺ പറഞ്ഞു.ആധാർ വിവരങ്ങൾ സുരക്ഷിതമാണെന്ന് കേന്ദ്ര സർക്കാർ നേരത്തെ സുപ്രീം കോടതിയിൽ വ്യക്തമാക്കിയിരുന്നു.വിവരങ്ങൾ ചോരാതിരിക്കാൻ കൃത്യമായ മുൻകരുതൽ സംവിധാനങ്ങൾ ഉണ്ടെന്ന് കേന്ദ്രസർക്കാർ ആധാർ കേസിൽ സുപ്രീം കോടതിയിൽ വ്യക്തമാക്കിയിരുന്നു.ഭരണഘടന ഉറപ്പു നൽകുന്ന പൗരന്റെ സ്വകാര്യത ആധാർ വിവര ശേഖരണത്തിലൂടെ ലംഘിക്കപ്പെടുന്നുവെന്നും വിവരങ്ങൾ സുരക്ഷിതമല്ലെന്നും ഹർജിക്കാർ വാദിച്ചിരുന്നു.ശക്തമായ സുരക്ഷാ സംവിധാനങ്ങളോടെയാണ് ആധാർ വിവരങ്ങൾ സൂക്ഷിച്ചിട്ടുള്ളതെന്ന് ഇതിനു മറുപടിയായി കേന്ദ്രസർക്കാർ കോടതിയിൽ പറഞ്ഞു.