കണ്ണൂർ:കീഴാറ്റൂരിൽ വയൽ നികത്തി ബൈപാസ്സ്‌ നിർമിക്കുന്നതിനെതിരെ സമരം നടത്തുന്ന വയൽക്കിളി സംഘടനയുടെ സമരനേതാവ് സുരേഷ് കീഴാറ്റൂരിന്റെ വീടിനു നേരെ ആക്രമണം. ഇന്ന് പുലർച്ചെ രണ്ടുമണിയോടുകൂടി രണ്ടു ബൈക്കുകളിലായെത്തിയ സംഘം വീടിനു നേരെ കല്ലെറിയുകയായിരുന്നു.കല്ലേറില്‍ വീടിന്റെ മുകളിലത്തെ നിലയിലെയും താഴത്തെ നിലയിലെയും ജനൽചില്ലുകൾ തകർന്നു.സംഭവത്തിന്റെ ദൃശ്യങ്ങള്‍ സമീപത്തെ ഒരു വീട്ടിലെ സിസിടിവി ക്യാമറയില്‍ പതിഞ്ഞിട്ടുണ്ട്. എന്നാല്‍ സംഭവത്തിന് പുറകില്‍ ആരാണെന്നതിനെ സംബന്ധിച്ച് പൊലീസിന് വ്യക്തതയില്ല.സുരേഷിന്റെ നേതൃത്വത്തിലാണ് കീഴാറ്റൂരിൽ ബൈപാസിനെതിരെ വയൽക്കിളികൾ എന്ന പേരിൽ പ്രദേശവാസികൾ സമരം നടത്തുന്നത്. അതേസമയം ഏത് നേരവും ഇത്തരത്തിലൊരു ആക്രമണം പ്രതീക്ഷിച്ചിരുന്നതായി സുരേഷ് കീഴാറ്റൂര്‍ പറഞ്ഞു.ബൈപാസ് പ്രശ്നത്തിൽ വയല്‍ക്കിളികളും സിപിഐഎമ്മും നേര്‍ക്കുനേര്‍ സമരവുമായി രംഗത്തെത്തിയതോടെ സംഘര്‍ഷാവസ്ഥയാണ് കീഴാറ്റൂരിലുള്ളത്. ഈ സാഹചര്യത്തില്‍ കനത്ത സുരക്ഷയാണ് പൊലീസ് ഒരുക്കുന്നത്.