മട്ടന്നൂർ: വെളിയമ്പ്രയിൽ ആരംഭിക്കുന്ന പഴശി സാഗർ ജലവൈദ്യുത പദ്ധതിയുടെ നിർമാണ പ്രവൃത്തി ആരംഭിച്ചു.നിർമാണ പ്രവൃത്തി ഏറ്റെടുത്ത കമ്പനിയായ തമിഴ്നാട് ഈറോഡിലെ ആർഎസ് ഡെവലപ്പേഴ്സ് കഴിഞ്ഞ ദിവസം മുതലാണ് പ്രവൃത്തി ആരംഭിച്ചത്. തമിഴ്നാട്ടിലെ കൂടംകുളം ആണവ നിലയത്തിന്‍റെ നിർമാണത്തിൽ പ്രമുഖ പങ്കുവഹിച്ച നിർമാണ കമ്പനിയാണ് ആർഎസ് ഡവലപ്പേഴ്സ്.80 കോടി രൂപയോളമാണ് പദ്ധതിയുടെ നിർമാണ ചിലവ്.പഴശി അണക്കെട്ടിനോടുചേർന്ന മൂന്നര ഹെക്ടർ സ്ഥലത്താണ് പ്രവൃത്തി നടത്തുന്നത്. പദ്ധതി പ്രദേശത്തെ പരമാവധി മരങ്ങൾ സംരക്ഷിച്ചാണു പദ്ധതി നടപ്പിലാക്കുന്നത്‌. പദ്ധതിക്കു ഡാം സുരക്ഷാ അതോറിറ്റിയുടെ അനുമതി നേരത്തെ ലഭിച്ചിരുന്നു.ജലസേചനത്തിനും കുടിവെള്ളത്തിനും കഴിച്ചുള്ള സംഭരണിയിലെ വെള്ളം ഉപയോഗിച്ചു 7.5മെഗാവാട്ടിന്‍റെ പദ്ധതിയാണു പഴശി സാഗർ ലക്ഷ്യമിടുന്നത്.ഈ പദ്ധതി യാഥാർഥ്യമാകുന്നതോടെ മട്ടന്നൂർ, പേരാവൂർ, ഇരിക്കൂർ മണ്ഡലങ്ങളിൽ വൈദ്യുത പ്രതിസന്ധിക്കു പരിഹാരമാകും.