ആറളം:ആനമതിൽ തകർത്ത് ഫാമിനുള്ളിൽ പ്രവേശിച്ച കാട്ടാനക്കൂട്ടം ഫാമിനകത്ത് കനത്ത നാശം വിതച്ചു.ഫാമിന്റെ അധീനതയിലുള്ള കൃഷിസ്ഥലത്ത് എത്തിയ കാട്ടാനക്കൂട്ടം വ്യാഴാഴ്ച പുലർച്ചയോടെ ഒൻപതു തെങ്ങുകൾ കുത്തി വീഴ്ത്തി.നിരവധി കശുമാവുകളും നശിപ്പിച്ചു. ഒരാഴ്ച മുൻപും കാട്ടാനക്കൂട്ടം ഫാമിന്റെ രണ്ട്,നാല് ബ്ലോക്കുകളിൽ നിന്നും 12 തെങ്ങുകൾ നശിപ്പിച്ചിരുന്നു.ഇതോടെ കഴിഞ്ഞ നാലുമാസത്തിനുള്ളിൽ കാട്ടാനക്കൂട്ടം ഇവിടെ 500 ഓളം തെങ്ങുകളാണ് നശിപ്പിച്ചിരിക്കുന്നത്.നേരത്തെ ഫാമിനകത്തു താമസമാക്കിയ ആനകൾക്ക് പുറമെ കഴിഞ്ഞ ദിവസം അഞ്ച് ആനകൾ കൂടി ആനമതിൽ തകർത്ത് ഫാമിനകത്തു പ്രവേശിച്ചിട്ടുണ്ട്.ആനക്കൂട്ടത്തെ വനത്തിലേക്ക് തുരത്താനുള്ള ഒരു നടപടിയും ഇത് വരെ വനം വകുപ്പിന്റെ ഭാഗത്തു നിന്നും ഉണ്ടായിട്ടില്ല.ഭയം കാരണം തൊഴിലാളികളും പുറത്തിറങ്ങാൻ കഴിയാത്ത സാഹചര്യമാണ് നിലവിലുള്ളത്.